Tvö barnamót

Við erum tekin aftur til við að halda mót fyrir börnin um helgar, nú þegar Skákþingi Akureyrar er lokið. Fyrsta mótið var haldið laugardaginn 15. febrúar. Þat tefldu fjögur börn tvöfalda umferð, alls sex skákir:

Markús Orri Óskarsson     6

Arna Dögg Kristinsdóttir  4

Sigþór Árni Sigurgeirsson 2

Guðrún Vala Rúnarsdóttir  0

Næsta mót var háð nú í dags, sunnudaginn 23. febrúar. Brá svo við að þátttaka var með allra besta móti. Úrslit:

1	Arna Dögg	5½
2	Markús Orri	4½
3	Tobias	4
	Sigþór	4
	Jökull Máni	4
6	Hulda Rún	3
	Kári Hrafn	3
	Alexía	3
	Kári Thoroddsen	3
	Damian	3
11	Brynjar Óli	2½
12	Markuss Veidins	1½
13	Jasmin Lóa	1

Hér má sjá nokkra af keppendum slaka á milli skáka. 

Fjölmennt skákmót í Brekkuskóla; Tobias hlutskarpastur

Fimmtudaginn 20. febrúar var haldið bekkjarmót í 5. bekk Brekkuskóla. Alls tóku 26 nemendur þátt í mótinu sem verður að teljast mjög góð þátttaka. Krakkarnir eru mjög áhugasöm um skákíþróttina og hafa nokkur þeirra verið að æfa sig reglulega í þessari fornu íþrótt.  

Að loknum fjórum umferðum höfðu þeir Baldur Thoroddsen og Tobias Matharel einir keppenda unnið allar sínar skákir og tefldu eina skák til úrslita um sigurinn í mótinu og sæmdarheitið „Skákmeistari 5. bekkjar 2020“. Eftir snarpa baráttu hafði sá síðarnefndi betur og er því bekkjarmeistari í þetta sinn.  Hér sjást þeir félagar tefla úrslitaskákina:

Eins og gefur að skilja má fátt út af bregða í svona stuttu móti og einn afleikur getur verið afdrifaríkur. Öll af þeim sem fengu þrjá vinninga á mótunu hefðu t.d. getað hampað sigrinum ef skákgyðjan hefði verið þeim örlítið hliðhollari.

Hér er lokastaðan; nöfn 10 efstu:

1	Tobias Matharel	4+1
2	Baldur Thoroddsen	4
3	Björk Hannesdóttir	3
	Brimir Skírnisson	3
	Emil Andri Davíðsson	3
	Hinrik Hjörleifsson	3
	Markuss Veidins	3
	Tryggvi Már Elínarson	3
9	Brynjar Örn Ólafsson	2½
	Smári Steinn Ágústsson	2½

Mótaröð í kvöld

Fjórða lota TM-mótaraðarinnar verður háð í kvöld, 20. febrúar og hefst kl. 20. Að venju allir velkomnir meðan húsrúm leyfir. Tefldar verða hraðskákir.

Stjórnin