Þátttökumet á Hausthraðskákmótinu!

Hið árlega hausthraðskákmót var haldið í dag, 21. október og var þar teflt um sæmdarheitið "Hraðskákmeistari Skákfélags Akureyrar". Nú bar svo við að nýtt þátttökumet var slegið þegar þrjú skákljón mættu til leiks og mun fámenni aldrei hafa verið svo mikið á skákmóti af þessi tagi hjá félaginu, a.m.k. ekki um áratugaskeið. Að mati kunnugra er hugsanlegt að sk. "stigafælni" hafi lagst á akureyrska skákmenn, en eins og rækilega var auglýst hafði verið ákveðið að mótið skyldi reiknað til alþjóðlegra hraðskákstiga. 
Keppendurnir þrír tefldu fjórfalda umferð, alls átta skákir og fengust afar hreinleg úrslit:

1. Áskell Örn Kárason    8

2. Sigurður Eiríksson    4

3. Hjörtur Steinbergsson 0

Næst verður reynt að æra óstöðuga nk. fimmtudagskvöld þegar fimmta lota mótaraðarinnar er á dagskrá. Að venju hefst taflið kl. 20. 

Jokkó óstöðvandi? Hausthraðskák á sunnudaginn

FImmtudaginn 18.10 fór fjórða umferð Mótaraðarinnar fram. Í öll fjögur skiptin hefur Jón Kristinn Þorgeirsson haft sigur en aðrir orðið að lúta í dúk.

Í töflunni hér að neðan má sjá vinningafjölda hvers og eins raðað eftir árangri á fimmtudaginn. Afrast er heildarfjöldi vinninganna.

	06.09.	13.09.	20.9.	18.10.	Samtals
Jón Kristinn Þorgeirsson	7.5	11	8	12.5	39
Símon Þórhallsson	3	6	6.6	12	27.6
Andri Freyr Björgvinsson	5.5	7	5	8.5	26
Áskell Örn Kárason			6	8.5	14.5
Haki Jóhannesson	3.5		5	6	14.5
Sigurður Arnarson	4.5	7.5		4.5	16.5
Smári Ólafsson	6			3	9
Hjörtur Steinbergsson	3		1	1	5
Ólafur Kristjánsson		7			7
Karl Egill Steingrímsson	3		3		6
Sigurður Eiríksson		2.5	4		6.5
Heiðar Ólafsson	0	1			1
Elsa María Kristínardóttir			5.5		5.5
Hilmir Vilhjálmsson			0		0

Ef einhver telur sig geta gert betur en Jón Kristinn er sá hinn sami hvattur til að mæta á morgun, sunnudag, en þá fer hausthraðskákmótið fram kl. 13.00.
Mótið verður reiknað til alþjóðlegra skákstiga.
Öll velkomin.

Hraðskák

Næstu tveir viðburðir fyrir almenna félagsmenn og velunnara á vegum Skákfélagsins eru hraðskáksmót. Annað kvöld, fimmtudaginn 18. 10. heldur Mótaröðin áfram. Herlegheitin hefjast kl. 20.00. Jón Kristinn Þorgeirsson hefur tekið afgerandi forystu í keppninni en aðrir keppendur munu reyna hvað þeir geta til að velta honum af stalli.
Sunnudaginn 21. 10. fer Hausthraðskákmótið fram. Verður það reiknað til alþjóðlegra skákstiga og hefst kl. 13.

Öll velkomin á bæði mót.