Haustmót SA - Arion bankamótið

Sigurður Arnarson efstur með fullt hús.

Haustmót SA-Arion bankamótið hófst sl. fimmtudagskvöld 3. október. Mótið var auglýst sem sjö umferða mót með fyrirvara um minniháttar breytingar ef þurfa þætti þegar fjöldi þátttakenda lægi fyrir.  Þegar til kom mættu níu keppendur til leiks; heldur færri en vænta mátti. Kom reyndar í ljós að ýmsir sem höfðu áhuga voru forfallaðir á síðustu stundu.  Í samráði keppenda og mótsstjóra var nú ákveðið að breyta fyrirkomulagi mótsins nokkuð. Þá hafði það áhrif á fyrirfram ákveðna dagskrá að leikur Akureyrar og IBV í handbolta var átti að fara fram á laugardag og skv. reynslu er heldur hljóðbært í Íþróttahöllinni til þess að hægt sé að tefla þar meðan slíkur stórleikur fer fram. Því varð úr að þrjár fyrstu umferðirnar fóru fram á fimmtudagskvöldið og tvær þær næstu á föstudagskvöld. Þannig voru fimm fyrstu umferðirnar tefldar með atskáksniði. Sjötta umferðin var svo háð í dag, sunnudag og þá með umhugsunartímanum 60 mínútur á skák að viðbættri hálfri mínútu fyrir hvern leik. Þau tímamörk gilda líka fyrir þrjár síðustu umferðirnar sem verða teldar 18. 19. og 20. október nk., að afloknu Íslandsmóti skákfélaga.  

Margt hefur gengið á á mótinu og nokkuð um óvænt úrslit. Þar ber hæst að Akureyrarmeistaranum sjálfum , Haraldi Haraldssyni, voru mjög mislagðar hendur í atskákunum og tapaði þremur fyrstu skákunum. Þetta tækifæri gripu þeir Sigurður og Smári og þustu fram úr keppinautum sínum, eins og sjá má af stöðunni eftir sex umferðir:  

Sigurður Arnarson          5 (af 5)

Smári Ólafsson              4,5 (af 5)

Símon Þórhallsson         4 (af 6)

Hjörleifur Halldórsson    2,5 (af 5)

Rúnar Ísleifsson            2,5 (af 5)

Sveinbjörn Sigurðsson   2 (af 6)

Haraldur Haraldsson     1,5 (af 5)

Karl Steingrímsson        1,5 (af 5)

Logi Rúnar Jónsson       0,5 (af 6)

Nánar má fræðast um einstök úrslit á Chess-results.          

Haustmót Skákfélags Akureyrar - Arionbankamótið

Skráning stendur nú yfir á haustmót SA, sem ber heiti Arion banka eins og í fyrra.  Mótið hefst á morgun kl. 20.00.

Dagskrá verður sem hér segir:

Fimmtudagur 3. október kl. 20.00 1-2. umferð

Föstudagur 4. október kl. 20.00 3. umferð

Laugardagur 5. október kl. 13.00 4.umferð

Sunnudagur 6. október kl. 13.00 5. umferð

(Hlé vegna Íslandsmóts Skákfélaga)

Laugardagur 19. október kl. 13.00 6. umferð

Sunnudagur 20. október kl. 13.00 7. umferð

Fyrirkomulag mótsins er áformað þannig, að fyrst verða tefldar tvær atskákir, en síðan fimm skákir með umhugsunartímanum 60 mínútur á skákina, auk þess sem 30 sekúndur bætast við fyrir hvern leik. Þó áskilur mótsstjórn sér rétt til að gera á þessu fyrirkomulagi minniháttar breytingar ef nauðsyn muni krefjast þess þegar fjöldi þátttakenda liggur fyrir.    Skráning er hjá formanni félagsins í [e-mail], eða á skákstað, í síðasta lagi 15. mínútum fyrir upphaf fyrstu umferðar. 

Þátttökugjald á mótið er kr. 3.000 fyrir félagsmenn, kr. 4.000 fyrir aðra. Eins og áður eru þeir unglingar sem greiða æfingagjald undanþegnir þátttökugjaldi. Peningaverðlaun verða veitt fyrir þrjú efstu sæti, auk einna stigaverðlauna. 

Haustið er tíminn!

Það má með sanni segja að skáktíðin nú í sumarlok byrji með látum! Skákfélagsmenn láta víða til sín taka í öðrum sóknum og nú styttist í að þeir geri það líka heimafyrir. Í Reykjavíkurhreppi stendur Haustmót TR nú yfir, öðru nafni Gagnaveitumótið. Þar tefla í efsta flokki félagar Stefán Bergsson og Gylfi Þórhallsson. Gylfi byrjaði fremur treglega, en er að sækja í sig veðrið, en Stefán hefur átt meira láni að fanga hingað til. Þeir félagar tefla frestaða skák sína úr fimmtu umferð einmitt í kvöld. Fylgjast má með árangri þeirra hér.

Nú um helgina hélt hið nýsameinaða félag GMH - eða öllu heldur Þingeyjararmur þess - hið árlega Framsýnarmót á Breiðumýri í Reykjadal. Þar voru keppendur alls 29 og mótið allt hið ánægjulegasta.  Skákfélagsmenn áttu nokkurn þátt í því og stóðu fyllilega undir væntingum aðdáenda sinna. Áskell Ö(ldungur) Kárason var þar efstur við annan mann, en þeir Sigurður Eiríksson (5 af 7), Logi Rúnar Jónsson (4,5), Andri Freyr Björgvinsson (4) og Símon Þórhallsson (3,5) bættu allir við sig skákstigum með árangri sínum. Haraldur Haraldsson (4,5) var um það bil á pari og endaði í fjórða sæti. Aðeins Stefán Bergsson (4) tapaði nokkrum stigum, en bætti það tap upp með afrekum á öðrum sviðum. Hann átti unnið á Áskel í lokaskákinni, en kaus að fylgja því ekki eftir. Allt má sjá um úrslit mótsins hér.  Myndum er stolið af skák.is.

Þá má ekki gleyma okkar mönnum suður með sjó, (þ.e. suður með Adríahafi - þar heitir Svartfjallaland), en þeir Mikael Jóhann Karlsson og Jón Kristinn Þorgeirsson, ungstirni okkar, etja þar kappi við helstu ungmenni Evrópu á skáksviðinu í EM ungmenna, sem hófst í gær, 29. sept. Þá náði Jón jöfnu við mun stigahærri menn, en Mikael mátti játa sig sigraðan gegn öðru ofurefli.Fylgjast má með framgangi þeirra félaga í dag hér.

En þá er komið að aðalmálinu, HAUSTMÓTI SKÁKFÉLAGS AKUREYRAR, sem hefst nú á fimmtudaginn. Dagskrá verður sem hér segir:

Fimmtudagur 3. október kl. 20.00 1-2. umferð

Föstudagur 4. október kl. 20.00 3. umferð

Laugardagur 5. október kl. 13.00 4.umferð

Sunnudagur 6. október kl. 13.00 5. umferð

(Hlé vegna Íslandsmóts Skákfélaga)

Laugardagur 19. október kl. 13.00 6. umferð

Sunnudagur 20. október kl. 13.00 7. umferð

Fyrirkomulag mótsins er áformað þannig, að fyrst verða tefldar tvær atskákir, en síðan fimm skákir með umhugsunartímanum 60 mínútur á skákina, auk þess sem 30 sekúndur bætast við fyrir hvern leik. Þó áskilur mótsstjórn sér rétt til að gera á þessu fyrirkomulagi minniháttar breytingar ef nauðsyn muni krefjast þess þegar fjöldi þátttakenda liggur fyrir.    Skráning er hjá formanni félagsins í [e-mail], eða á skákstað, í síðasta lagi 15. mínútum fyrir upphaf fyrstu umferðar.