Frábær frammistaða Áskels á HM öldunga

Áskell Örn Kárason (2220) stóð sig frábærlega á HM öldunga (60+) sem lauk í dag í Rijeka í Króatíu. Áskell hlaut 7 vinninga í 11 skákum og var um tíma afar nærri áfanga að alþjóðlegum meistaratitli.

Í tíundu og næstsíðustu umferð tapaði hann fyrir rúmenska stórmeistaranum Mihai Suba (2413) í æsispennandi skák en í lokaumferðinni gerði hann jafntefli við danska FIDE-meistarann Jörn Sloth (2338).

Áskell endaði í 17.-36. sæti (18. á stigum) en fyrir mótið var hann í 61. sæti styrkleikalistans. Frammistaða Áskels samsvaraði 2388 skákstigum og hækkar hann um heil 38 stig fyrir hana.

Gunnar Finnlaugsson (2082) hlaut 5,5 vinning og endaði í 91.-119. sæti. Hann hækkar lítilsháttar á stigum eða um 2 stig.

Franski stórmeistarinn Anatoly Vaisser (2523) er heimsmeistari öldunga. Hann kom jafn í mark og fráfarandi heimsmeistari öldunga Jens Kristiansen (2407) en fékk titilinn eftir stigaútreikning.

Hér fyrir neðan má sjá árangur formannsins í mótinu. Hann tapaði aðeins einni skák. Á töflunni sést einnig að hann græddi stig í öllum skákum nema tveimur og að hann tefldi við 8 titilhafa á mótinu.

Rd.	Bo.	SNo		Name	RtgI	FED	Pts.	Res.	we	w-we	K	rtg+/-
1	61	162		Belokopyt Boris	1942	RUS	4.5	s ½	0.83	-0.33	15	-4.95
2	52	160		Baumgarten Werner	1943	GER	4.0	w 1	0.83	0.17	15	2.55
3	15	9	IM	Blechzin Igor	2411	RUS	6.5	w 1	0.25	0.75	15	11.25
4	13	35	FM	Thormann Wolfgang	2271	GER	7.5	s ½	0.43	0.07	15	1.05
5	14	27		Chernov Evgen	2325	UKR	6.5	w 1	0.36	0.64	15	9.60
6	7	14	IM	Kakageldyev Amanmurad	2384	TKM	7.5	s ½	0.28	0.22	15	3.30
7	9	19	IM	Shvedchikov Anatoli I.	2363	RUS	7.0	w ½	0.31	0.19	15	2.85
8	9	15	FM	Herzog Adolf	2379	AUT	8.0	s ½	0.29	0.21	15	3.15
9	12	16	IM	Karasev Vladimir I	2377	RUS	7.0	s 1	0.29	0.71	15	10.65
10	5	8	GM	Suba Mihai	2413	ROU	8.0	w 0	0.25	-0.25	15	-3.75
11	13	26	FM	Sloth Jorn	2338	DEN	7.0	s ½	0.34	0.16	15	2.40

 

Jón Kristinn sigurvegari skylduleikjamóts

Í dag fór fram skylduleikjamót með umhugsunartímanum 5 mínútur á leik +3 sekúndur. Á slaginu eitt voru 8 keppendur mættir og tefldu þeir allir við alla. 

Tefldir voru 7 mismunandi gambítar, einn í hverri umferð og þökkum við Símoni Þórhallssyni fyrir gott val á gambítum. Eftir harða baráttu, endaði eins og svo oft áður, Jón Kristinn efstur og fékk hann 6 vinninga. Í öðru sæti varð Hjörleifur Halldórsson með 5 1/2 vinning. Í þriðja sæti varð svo Sigurður Eiríksson með 4 vinninga.

 

 

 

 

 

 

Lokastaða mótsins:

Jón Kristinn Þorgeirsson 6

Hjörleifur Halldórsson 5 1/2

Sigurður Eiríksson 4

Símon Þórhallsson 3 1/2

Andri Freyr Björgvinsson og Sveinbjörn Sigurðsson 3

Karl Egill Steingrímsson 2

Logi Rúnar Jónsson 1 

Að skella í sig súpu

Í gær beið Áskell sinn fyrsta ósigur á heimsmeistaramóti öldunga. Fyrstur til að leggja kappann var stórmeistari frá Rúmeníu, Suba að nafni. Hann hefur áður gert okkur Íslendingum skráveifu. Frægt varð að eindæmum þegar hann tefldi við Íslending á Ólympíumóti árið 1978. Sú skák var jafnteflisleg þegar hún fór í bið. Þá hringdi Suba í landsliðsmanninn Ingvar og bauð honum jafntefli sem Ingvar þáði. Morguninn eftir mættu þeir báðir til skákstjóra en þá kannaðist Suba ekkert við jafnteflisboðið svo þeir þurftu að setjast að tafli. Auðvitað vann dóninn enda hafði hann skoðað stöðuna með sínum aðstoðarmönnum en ekki Ingvar.

Skákin gekk þannig fyrir sig að Áskell, sem hafði hvítt, byggði upp efnilega sóknarstöðu á kóngsvæng en Suba leitaði eftir mótspili á drottningarvæng.  Þótti fréttaritara staða formannsins vænleg lengi framan af en ekki er sopin súpan þótt í ausuna sé komin og svo fór að lokum að Suba skellti formanninum eftir miklar sviptingar þar sem Áskell teygði sig heldur of langt til vinnings.

Í dag mætir Áskell hinum geðuga Dana Jørn Sloth í lokaumferð mótsins. Áskell lagði hann á Bornholm og tryggði sér þátttökurétt á heimsmeistaramótinu. Þeim Norðurlandabúum er vel til vina en enginn er annars bróðir í leik. Skákin verður í beinni á netinu og hefst kl. 15. Slóð á skákina má finna og má finna neðar á síðunni.