Skákþingið: Stefán einn í forystu.

Aðeins fjórar skákir voru tefldar í 2. umferð í kvöld. Bæði komu til yfirsetur og hin margfræga ekkjufrú Skotta (sem gerir jafntefli í sínum skákum í þessu móti), auk þess sem einn keppandi forfallaðist á síðustu stundu og mætti því ekki til leiks. 

Af hinum tefldu skákum er það helst að frétta að báran var stigin afar þunglega í skák Smára og Sigurðar. Sá síðarnefndi setti snemma upp ísfirskan biskup á b7 sem virtist óviðráðanlegur, jafnvel fyrir marghertan leigubílstjóra. Þvældist sá eyfirski um hríð í aðeins lakari stöðu og brátt ruddust hinir þungu menn Sigurðar með hjálp af biskupnum inn á kóngsstöðu taxidræversins úr Staðarbyggðinni. En kóngur hans slapp á hlaupum suður allan fjörð og nú fóru ísfirsku kallarnir að grípa í tómt. Snörist þá taflið við og Smári (sá eyfirski) virtist hafa taflið í hendi sér. En þegar honum förlaðist náði ísfirski guðsmaðurinn aftur að láta til sín taka og um síðir fundu menn ekki önnur ráð en að þrátefla. Stóðu þá báðir laklega eins og stundum er sagt.  Stóð þessi skák lengst allra og var stórbrotin. 
Sigþór missté sig snemma í skákinni við Markús og mátti gefa mann í upphafi miðtafls. Eftir það var ekki að sökum að spyrja og Akureyrarmeistarinn knúði fram sigur af öryggi þótt það tæki sinn tíma. 
Stefán átti harma að hefna gegn Benedikt frá því í boðsmótinu. Hér mættust því aftur fulltrúar hinna merku þveráa Eyjafjarðardala (Munka- og Bægis-); miklir andans menn sem draga dám af sínum fæðingarstöðum. Enda bar taflmennskan andríki þeirra greinilegan vott. Báðir tefldu af krafti, en skyndilega skellti svört munkadrottning (ekki nunna samt) sér inn í Bægisárstöðuna og svo fylgdu tveir hrókar. Þegar öðrum þeirra var fórnað og hinn bjó sig undir sömu örlög var Paradísarmissir Benedikts fullkomnaður og hann mátti gefast upp. Var þá hefnt fyrir umrætt tap á boðsmótinu.
Af Kussungsstaðaætt var svo mættur Valur Darri (stundum nefndur Val-dari) og atti kappi við hálfnafna siðbótarklerksins alkunna, Eymund Lúther. Sá fyrrnefndi tefldi hvasst með hvítu mönnunum og fórnaði peði snemma tafls. Lúther svaraði því af yfirvegun og gætti þess að veikja ekki stöðu sína. Upp kom endatafl þar sem svartur (E. Lúther) hafi klárt frumkvæði og hættulegan frelsingja, en Kussungstaðakappinn kunni sína lexíu (virkja kónginn!) og þegar þjóðhöfðinginn kom á vettvang voru dagar frelsingjans taldir. Þá bauð Eymundur jafntefli sem var þegið. 

Smári-Sigurður       1/2
Benedikt-Stefán      0-1
Valur Darri-Eymundur  1/2
Sigþór-Markús        0-1
Goði-Karl            0-1 (hvítur mætti ekki) 

Stefán því einn efstur með fullt hús að tveimur umferðum loknum, en Smári, Sigurður og Karl hafa einn og hálfan. Aðrir hafa færri vinninga.  
Næst verður teflt á sunnudag. 

Þá eigast þessir við:
Sigurður og Stefán
Karl og Smári
Markús og Valur
Eymundur og Benedikt
Björgvin og Baldur
Goði og Sigþór
Tobias situr yfir

Chess-results.comhttps://chess-results.com/tnr1098985.aspx?lan=1&art=2&rd=3

Fyrsta umferð SÞA; bókin hikstaði aðeins

Fyrsta umferð 89.Skákþings Akureyrar var tefld í dag. Alls mættu 12 keppendur til leiks, sem var mjög eftir væntingum. Eins og stundum áður átti bæði ungir og aldnir sína fulltrúa og nálgast aldursmunur yngsta og elsta keppanda 70 ár! Reyndar telfdu þessir fulltrúar kynslóðanna saman í fyrstu umferð. En úrslitin:
Markús-Benedikt   0-1
Sigþór-Smári      0-1
Baldur-Sigurður   0-1
Eymundur-Goði     1/2
Stefán-Björgvin   1-0
Karl og Valur Darri sátu hjá.

Af einstökum skákum er það að segja að viðureignum Stefáns og Björgvins og Sigþórs og Smára lauk fremur snemma með sigri hinna lífsreyndu. Skák Baldurs og Sigurðar var mjög spennandi þar sem sá síðarnefndi missti niður vænlegt tafl gegn ákafri sókn Baldurs. Um tíma var mát eða drottningarvinningur í boði fyrir ungmennið, en hann sá ekki að sér og skipti upp í tvísýnt endatafl, sem hann tapaði að lokum, enda við fyrrverandi sýslumann að eiga.  
Þá var komið að Eymundi og Goða Svarfdal, (sem er jafnaldri Baldurs, enn í grunnskóla). Þar fékk sá síðarnefndi snemma prýðisgóða stöðu fyrir tilstilli franskrar varnar. Eymundur sá þá þann kost nænstan að efna til hörkulegrar kóngssóknar og náði eftir mannsfórn að tryggja sér þráskák og jafntefli. 
Þá var aðeins eftir skák fráfarandi Akureyrarmeistara, Markúsar Orra; gegn Hörgdælingnum harðskeytta, Bendikt Bægisárjarli. Það var vegist á og lengi óvíst hvernig fara myndi. Akureyrarmeistarinn langði mikið undir en sá Hörgdælski kom með öflugt mótbragð fór líka í sókn. Þá saxaðist mjög á tíma Markúsar. En skákin hélt áfram að vera æsispennandi. Þegar Bensi virtist vera að ná haustaki á Markúsi, náði sá síðarnefndi að fórna skiptamun og fékk að launum tvo hættulega frelsingja. Að endingu var það þó öflug gagnsókn Bægisár-Bensa með tveimur hrókum gegn kóngi Markúsar sem réði úrslitum (ásamt tímahraki þess síðarnefnda). Satt að segja óvænt úrslit og baráttan um meistaratitilinn opin sem aldrei fyrr!

Önnur umferð fer fram á miðvikudag og hefst kl. 18.00.
Þá munu þessir leiða saman fáka sína:
Smári og Sigurður
Benedikt og Stefán
Goði og Karl
Valur Darri og Eymundur
Sigþór og Markús
Baldur og Björgvin sitja yfir.

Skákþing Akureyrar, hið 88. í röðinni!

88. Skákþing Akureyrar

hefst sunnudaginn 12. janúar kl. 14.00.

Teflt verður í Skákheimilinu í Íþróttahöllinni við Skólastíg.

 

Fyrirkomulag: Tefldar verða sjö umferðir skv. svissnesku kerfi.  Leyfðar eru tvær yfirsetur í mótinu, þó ekki í lokaumferðinni.

Sigurvegarinn mun hljóta sæmdarheitið „Skákmeistari Akureyrar 2025“.  

Mótið er öllum opið, bæði ungum sem gömlum.

Umhugsunartími verður 90 mínútur á skákina, auk þess sem 30 sekúndur bætast við tímann fyrir hvern leik (90+30).   

Þátttökugjald er kr. 4.000 fyrir skuldlausa félagsmenn, kr. 5.000 fyrir aðra. Þátttaka er ókeypis fyrir þá unglinga sem greitt hafa æfingagjald. 

Mótið verður reiknað til alþjóðlegra skákstiga.

Skráning er í netfangið [e-mail] eða á facebook síðu Skákfélags Akureyrar. Einnig er hægt að skrá sig á skákstað eigi síðar en 10 mínútum fyrir upphaf fyrstu umferðar.

 

Dagskrá í verður sem hér segir: (sjá þó fyrirvara hér að neðan.)

1. umferð sunnudaginn  janúar    kl. 14.00     
2. umferð miðvikudaginn janúar   kl. 18.00
3. umferð sunnudaginn janúar    kl. 13.00     
4. umferð miðvikudaginn janúar   kl. 18.00
5. umferð laugardaginn 25 .janúar   13.00     
6. umferð miðvikudaginn janúar   kl. 18.00
7. umferð sunnudaginn febrúar   kl. 13.00

 

Fyrivari um fyrirkomulag: Þegar fjöldi keppenda liggur fyrir getur mótsstjóri gert minniháttar breytingar á dagskrá og fyrirkomulagi til að auðvelda framkvæmd mótsins.

Þátttaka í mótinu er öllum heimil en Skákmeistari Akureyrar getur aðeins sá orðið sem er búsettur á Akureyri og/eða er fullgildur félagi í Skákfélagi Akureyrar. 

 

Núverandi Skákmeistari Akureyrar er Markús Orri Óskarsson.