Vignir Vatnar vann afmælismótið

Afmælismóti Ólafs Kristjánssonar lauk með öruggum sigri alþjóðameistarans Vignis Vatnars Stefánssonar, sem leyfði aðeins tvö jafntefli í 11 skákum. Efstu menn:

Vignir Vatnar Stefánsson     10

Benedikt Briem                7,5

Stephan Briem                 7,5

Jón Kristinn Þorgeirsson      7

Rúnar Sigurpálsson            7

Áskell Örn Kárason            7

Næstir með 6,5 vinning voru þeir Ingvar Wu Skarphéðinsson, Gauti Páll Jónsson, Adam Omarsson og Bragi Halldórsson. 

Veitt voru verðlaun fyrir fimm efstu sætin á mótinu. Auk þess kvennaverðlaun, sem Iðunn Helgadóttir hlaut; öldungaverðlaun sem féllu í skaut Áskeli og tvenn verðlaun í stigaflokkum. Benedikt Þórisson fékk verðlaun í -1600 stiga flokki og Benedikt Briem í -2000 stiga flokki. 
Mótið fór fram í Hömrum í menningarhúsinu Hofi og heppnaðist afar vel. Fyrir utan öruggan sigur Vignis var hart barist um verðlaunasætin. 

Skákstjórinn Þórir Benediktsson tók þessa mynd af verðlaunahöfum, auk afmælisbarnsins Ólafs og höfuðpaursins Smára. 

Öll úrslit og lokastöðuna má sjá á chess-results.

Aðalfundur 11. september

Boðað er til aðalfundar Skákfélags Akureyrar sunnudaginn 11. september kl. 13.00.

Aðalfundur fer með æðsta vald í málefnum félagsins. Fyrir aðalfdundi liggur skýrsla um störf félagsins á starfsárinu, svo og upplýsingar um fjárreiður þess. Ársreikningur eru borinn undir fundinn til samþykktar. Þá er kjörinn formaður og stjórn fyrir komandi starfsár. Aðalfundur getur gert breytingar á lögum félagsins, berist tillögur um slíkar breytingar með hæfilegum fyrirvara, sem nú miðast við fimm daga fyrir fundinn.

Að loknum aðalfundi fer fram hið árlega startmót félagsins. Það hefst í fyrsta lagi kl. 14.00  

Barna- og unglingaæfingar að hefjast

Æfingar Skákfélagsins fyrir börn og unglinga hefjast í fyrstu viku septembermánaðar. Dagskráin er svona:

Almennur flokkur (yngri börn og byrjendur): Á föstudögum kl. 16:30-18:00. Fyrsta æfing föstudaginn 9. september. Þjálfarar Elsa María Kristínardóttir og Hilmir Vilhjálmsson.

Framhaldsflokkur: Á mánudögum kl. 17:30-19:00 og á fimmtudögum kl.15:30-17:00. Fyrstu æfingar 5. og 8. september. Hægt er að velja æfingar einn eða tvo daga í viku. Þjálfarar Áskell Örn Kárason og Andri Freyr Björgvinsson.

Gert er ráð fyrir því að iðkendur sem fæddir eru árið 2013 og síðar taki þátt í almennum flokki, en framhaldsflokkurinn getur þó verið opinn ungum iðkendum sem hafa stundað reglulegar æfingar undanfarin tvö ár. Eins er áhugasömum börnum sem fædd eru árið 2012 og 2011 ráðlagt að byrja í almennum flokki ef þau hafa litla reynslu af skákæfingum. 

Hægt er að skrá börnin með skeyti á netfangið [e-mail], eða í upphafi fyrstu æfingar.