Jóla(pakka)mót og uppskeruhátíð á sunnudag.

Nú á sunnudag, 11. desember höldum við jólamót fyrir börnin. Veitt verða verðlaun í þremur aldursflokkum:
Yngri flokki (f. 2013 og síðar)
"Miðflokki" (f. 2011-2012)
Eldri flokki (f. 2010 og fyrr)
Mótið hefst kl. 11. 
Að mótinu loknu (ca. 12.30) höldum við smáveislu og afhendum verðlaun fyrir haustmisserið. 
Foreldrar eru velkomnir.

Áskell og Tobias atskákmeistarar

Atskákmót Akureyrar fór fram dagana 20-21. nóvember sl. Keppendur voru 10 og tefldu sex umferðir eftir svissnesku kerfi. Umhugsunartími á skák var 20-5. 

Áskell Örn Kárason vann fyrstu fjórar skákirnar; gerði svo stutt jafntefli við Smára Ólafsson í 5.umferð og tryggði sér sigurinn á mótinu með sigri í lokaumferðinni. Hann fékk því 5,5 vinninga úr sex skákum. Sigurður Eiríksson tapaði aðeins fyrir Áskeli en vann aðrar skákir sínar og varð því annar með 5 vinninga. Þriðji var svo Smári Ólafsson með 4,5. 

Af yngri keppendum (f. 2007 og síðar) varð Tobias Þórarinn Matharel hlutskarpastur; fékk 3 vinninga. Hann er því atskákmeistari í unglingaflokki.  

Öll úrslit og lokastöðuna má finna á chess-results. 

Næsti viðburður í Skákheimilinu verður hraðskákmót fimmtudagskvöldið 24. nóvember. Taflið hefst kl. 20.

Atskákmótið; Áskell efstur eftir fyrri daginn

Tíu keppendur mættu til leiks í þetta sinn og voru tveir aldurshópar mest áberandi., yngri og eldri.  Allir á þrítugs, fertugs- og fimmtugsaldri voru vant við látnir annarsstaðar.  
Ákveðið var að tefla sex umferðir skv. svissnesku kerfi og er nú fyrstu fjórum umferðunum lokið. Áskell er efstur eftir þennan fyrri dag með fjóra vinninga, Sigurður Eiríksson, Smári Ólafsson og Karl Steingrímsson koma á hæla honum með þrjá vinninga. 

Mótinu verður fram haldið á morgun kl. 18. Í fimmtu umferð tefla m.a. saman Áskell og Smári og Karl og Sigurður.  Öll úrslit og staðan á chess-results.