Haustmótið; þrír efstir þegar tvær umferðir eru eftir.

Fimmta umferð haustmótsins og línur aðeins farnar að skýrast. Nú verður gert hlé í þrjár vikur vegna Evrópumóts skákfélaga og Íslandsmóts skákfélaga. Sjötta umferðin á dagskrá þann 18. október.
Í kvöld lauk skákinum á neðri borðum nokkuð snemma.
Sigþór-Damian                  1-0
Goði-Gabríel                   0-1
Jökull Máni-Natan              0-1
Nokkuð öruggir sigrar í þessum tilvikum, en helst kom á óvart tap Jökuls Mána fyrir Natan. Sá fyrrnefndi fórnaði manni fyrir tvö peð og sókn (Bxh6; gxh6 og Dxh6) sem virtist vænleg. Hann fann þó ekki besta frranhaldið og leyfði of mikil uppskipti; lenti í töpuðu endatafli. Fórnin var hinsvegar áhættunnar virði þótt svona færi. Fyrsti sigur Natans gegn „stigamanni“ sem alltaf er mjög mikilvægt.
Þegar þessum skákum lauk voru skákirnar fjórar á efri borðum enn í miðjum klíðum og alls óvíst um úrslit.

Helgi Valur-Markús 0-1
Lundúnakerfið hjá Helga og þung og róleg stöðubarátta lengi vel. Eftir vendingar á miðborðinu og töluverð uppskipti kom upp endatafl með hrókum og biskupum þar sem hvítur hafði tvo samstæða frelsingja á drottningarvæng sem voru erfiðir viðureignar. Markús reyndi mótvægisaðgerðir á miðborði, þar sem hann var með peðameirihluta. Helgi gerði þá þau mistök að seilast eftir meinlausu svörtu peði á e4 sem gaf Markúsi tækifæri til að virkja hrók sinn og brjótast áfram með d-peðið. Það varð að drottningu, sem og b-peð hvíts, en nú var hvíti kóngurinn berskjaldaðri en sá svarti og mát eða stórfellt liðstap varð ekki umflúið.  Heldur snautlegt tap hjá Helga Val en jafnframt góður varnarsigur hjá Markúsi. Holl lexía fyrir báða þessa ungu kappa.

Arnar Smári-Hreinn 1-0
Æskan og ellin hér eins og í fleiri skákum á þessu móti. Arnar tefldi hvasst til sigurs gegn Sikileyjarvörn Hreins og var hrókað á sitthvorn vænginn. Hvítur gaf skiptamun til að efla sóknina og fékk í staðinn öflugt biskupapar.  Svarts beið það hlutskipti að verjast og reyna að ná uppskiptum, auk þess sem hann glímdi við yfirvofandi tímahrak.  Þegar til kastanna kom reyndist staða hans ekki nægilega virk til að andæfa öflugu hvítu frumkvæði og eftir að hann neyddist til að gefa drottninguna fyrir hrók til að forðast mát var öll nótt úti.

Sigurður-Stefán 1-0
Kóngsindversk vörn og virtist svartur vera kominn með jafnt tafl eftir byrjunina. Þungu mennirnir voru enn á borðinu, auk riddara hjá svörtum sem virtist heldur liðugri en biskup hvíts. Sigurður náði þó undirtökunum þegar honum tókst að véla peð af Stefáni, auk þess sem hann gat skipt biskup sínum fyrir riddarann fyrrgreinda. Eftir þetta sáu þungu mennirnir um glímuna þar sem hvítur hafði meira rými. Tilraunir svarts til mótspils höfðu frekara liðstap í för með sér og þá var ekki að sökum að spyrja.

Andri-Eymundur 1-0
Hér kom einskonar katalóníubyrjun upp á teningnum. Svarta staðan var nokkru þrengri, auk þess sem hann var í vandræðum með biskupinn á c8. Svartur náði skemmtilegum gagnfærum með b7-b5 leik á réttum tíma en gætti sín ekki í framhaldinu og varð að gefa skiptamun.Hann gat þó huggað sig við hraustlegt frípeð á a-línunni. Sterkt miðborð og yfirburðir í liðsafla nægðu hvítum þó til að sigla sigrinum í höfn, enda tíminn naumur hjá Eymundi til að finna bestu mótvægisaðgerðir.

Andri Freyr, Sigurður og Arnar Smári eru þá efstir með fjóra vinninga, en Eymundur kemur næstur með 3,5. Staðan að öðru leyti og öll úrslit á chess-results.

Í sjöttu umferð, (sem tefld verður eftir hlé) munu þessir eigast við:
Eymundur og Sigurður
Gabríel og Andri
Markús og Arnar Smári
Hreinn og Valur Darri
Natan og Sigþór
Stefán og Goði
Damian og Jökull Máni
Helgi Valur fær Skottu
  

Fjórða umferð; Eymundur enn efstur

Úrslit sem hér segir:
Hreinn-Eymundur      1/2
Skákin á efsta borði varði í 15 leiki og var "gífurlega flókin allan tímann" að sögn keppenda. Þeir ákváðu því að taka enga áhættu og sömdu um jafntefli. 

Markús-Andri 0-1
Andri beitti Benkö-bragði og upp kom tvísýn staða eins og væntan mátti. Svartur gat þó vel við unað þegar komið var inn í miðtaflið. Hann tók dálítið grófan séns með veikingu kóngsstöðunnar, 15 - g5 til að hrekja hvítan riddara brott frá f4. Markús lék grunlaus 16. Rf4-d3, en króaði þá drottningu sína af og mátti gefa hana fyrir tvo létta menn. Skákin hélt áfram um hríð þar sem hvítur hafpi tvo virka biskupa á móti svörtu drottningunni (báðir með hrókana enn inn á), en það reyndist ekki duga; kvensniftin var of öflug. 

Gabríel-Sigurður 0-1
Hörkuskák þar sem Sigurður beitti Pirc-vörn. Báðir tefldu grimmt til sóknar og tók Gabríel nokkra áhættu með því að opna kóngsstöðu sína. Hann var með óvirka menn á drottningarvæng (einkum Bb3 sem var lokaður af hvítu peði á d5),  og varð því í raun manni undir þegar taflið opnaðist. Þá voru líka peðin fyrir framan kónginn (á g1) farin forgörðum og engin vörn gegn mátssókn svarts.

Stefán-Arnar Smári 0-1
Ein óvæntustur úrslit mótsins, enda u.þ.b. 200 stiga munur á þessum keppendum. Eftir hægfara spánskan leik náði svartur vænlegum kóngssóknarfærum með riddara á f4 og tókst síðan að afhjúpa hvóta kónginn með því að ná peðinu á h3. Drottning, riddari og tveir biskupar svarts saumuðu svo örugglega að hvíta kónginum og um síðir varð Stefán að gefa mikið lið til að forðast mát. Snaggaralegur sigur hjá Arnari Smára. 

Natan-Helgi Valur 0-1
Natan beitti Onrangutanbyrjun (1. b4) í annað sinn á mótinu en fékk snemma heldur lakari stöðu og í framhaldinu náði Reyðfirðingurinn raungóði að þvinga fram vinning. Stutt skák og auðveld fyrir svartan.

Valur Darri-Sigþór 1/2
Eftir enska byrjun þróaðist taflið mjög rólega og fátt gerðist í eina 50 leiki annað en að skipt var upp á d5 (Rc3-d5; Rf6xd5) og d4 (samskonar uppskipti). Svo fór þó að Sigþór vann peð og fór út í mjög vænlegt hróksendatafl, en vinningurinn var ekki auðsóttur og Valur sýndi mikil klókindi í lokin þegar hann bjargaði hálfum vinningi í hús. Í lokin voru bara kóngarnir á borðinu og þá er ekki hægt að halda áfram.  

Damian-Goði 0-1
Frönsk vörn varð að lokiðum Sikileyingi hjá þeim félögum og fátt um fína drætti, þar til Damian ákvað að gefa mann að ástæðulausu. Eftir það sigldi Svarfdælingurinn skákinni heim af fullkomnu öryggi.

Stöðuna og öll úrslit má finna á chess-results.

Við látum þess þó getið að Eymundur er nú efstur með 3,5 vinninga en þeir Andri Freyr, Hreinn,  Sigurður og Arnar Smári koma á hæla honum með 3 vinninga. Fimmta umferð verður tefld á miðvikudaginn (hefst kl. 18.00) og þá leiða þessir saman hesta sína:
Andri og Eymundur
Arnar Smári og Hreinn
Sigurður og Stefán
Helgi Valur og Markús
Goði og Gabríel
Sigþór og Damian
Jökull Máni og Natan
Valur Darri fær Skottu.  

 

Haustmótið; Eymundur einn með fullt hús

Úrslit í þriðju umferð í gærkveldi:
Eymundur-Stefán   1-0
Sigurður-Andri    1/2
Helgi Valur-Hreinn 0-1
Arnar Smári-Valur Darri 1-0
Goði-Markús   0-1
Damian-Gabríel   0-1
Sigþór-Jökull Máni 1-0

Fjórða umferð verður tefld á sunnudag kl. 13 og þá eigast þessir við:
Hreinn og Eymundur
Markús og Andri
Gabríel og Sigurður
Stefán og Arnar Smári
Natan og Helgi Valur
Valur Darri og Sigþór
Damian og Goði
Jökull Máni situr yfir.

Eymundur er því einn efstur með 3 vinninga og Hreinn næstur með 2,5. Stöðuna má sjá á chess-results.