8-3 mót á morgun 9/2 kl 13

og svo hraðskák á miðvikudag 12/2 kl. 20.

Skákþing Akureyrar; Markús meistari annað árið í röð

Sjöunda og síðasta umferð Skákþings Akureyrar var tefld í dag, 2. febrúar. Að venju varð baráttar hörð og ströng. Úrslit:

Benedikt-Baldur      0-1
Sigurður-Tobias      0-1
Karl-Valur Darri     1/2
Stefán-Smári         1-0
Eymundur-Markús      0-1

Fyrstir til að ljúka skák sinni voru Bægisár-Bensi og Baldur af ætt Thoroddsena. Sá síðarnefndi er yngismaður og í stöðugri framför. Bensi hefur verið að sækja sig líka, en voru mislögð peð í þessari skák. Staðan var lengi í jafnvægi, uns Bensi náði hættulegum færum með peði á d-línunni.  Baldur fékk mótspil gegn hörgdælska kónginum sem hefði átt að duga til jafnteflis, en það vildi Baldur ekki. Fékk hann þá tapað tafl, en hélt samt áfram vinningstilraunum sem báru árangur eftir slæman afleik Benedikts.
Þá var komið að Tobiasi, bekkjarbróður Baldurs, sem er rísandi stjarna eins og hann. Beitti Grünfeldsvörn gegn Sigurði en reyndist ekki kunna fræðin eftir 5.Db3. Hélt sér þó á floti með glúrnum leikjum og þar kom að sýslumannsfulltrúinn spennti bogann of hátt og fórnaði manni. Fékk hættulegt frípeð í sárabætur og eftir nokkrar flækjur tókst T.Matharel að koma sér í unnið hróksendatafl. Gott mót hjá pilti. 
Valur Darri er líka í mikilli framför og náði hálfgerðu steinbítstaki á Trillu-Kalla. Sá kann að veiða steinbít og fann það helst sér til lífs að skipta upp í peðsendatafl, þar sem enn voru sjö peð á borðinu. Það hefði átt að vera léttunnið hjá unga manninum, en tæknin í svona endatöflum er ekki alveg komin til hans, svo jafntefli varð niðurstaðan.
Í skák Stefáns og Smára var greinilega barist um verðlaun. Þar skildi á milli keppenda að Smári var nýkominn af þorrablóti, en Stefán enn ófarinn á þá samkomu. Olli það því að hann fékk næsta óviðráðanlegan riddara á d5 (og hafði hvítt) en mótspil þorraþrælsins, (sem virtist nokkuð öflugt um tíma), náði ekki alveg tilgangi sínum og mátti hann eftir ónákvæman leik gefa skákina. 
Síðasta skákin sem kláraðist var á milli Eymundar og Markúsar - og var þá ljóst eftir töp Sigurðar og Smára að sá síðarnefndi myndi vinna mótið, hvernig sem færi. Akureyrarmeistarinn fékk snemma nokkuð þægilega stöðu en Eymundur tefldi traust og móaðist við. Að lokum tókst Markúsi þó að brjótast í gegn og ná slíkum hótunum gegn hvíta kóngnum að hann vann mann. Með tvo létta gegn einum var eftirleikurinn auðveldur. 

Eins og sjá má af lokastöðunni var sigur Markúsar öruggur - þrátt fyrir tap í fyrstu skákinni. Hann var aldrei í vandræðum eftir það. Annað sæti Stefáns verður líka að teljast verðskuldað - hann er stöðugt að sækja sig þótt sé kominn rétt yfir miðjan aldur. Þá má segja að Tobias hafi komið sterkur inn og er greinilega í framför; sá keppandi sem bætti mest við sig á stigum. Aðrir átti misgott mót, en pistlaskrifari fylgist alltaf sérstaklega með ungum iðkendum. Bæði Valur Darri og Baldur (sem vonandi fer að komast inn á stigalista!) stóðu sig með sóma og munu vonandi sækja sig í áframhaldinu. 

Við vísum svo á chess-results um lokastöðuna. Eg bið athugendur bara að taka mið af því að útreikningar chess-results eiga ekki alveg við annað sætið; þar hefur Stefán vinninginn, þrátt fyrir það sem ch-r sýnir. Tobias tefldi of fáar skákir til að hljóta silfrið. 

Skákþingið; Markús á sigurbraut

Sjötta og næstsíðasta umferð 89. Skák.ings Akureyrar var tefld í kvöld. Úrslit:
Stefán-Markús        0-1
Sigurður-Eymundur    1/2
Smári-Benedikt       1-0
Tobias-Karl          1-0
Baldur-Sigþór        0-1
Valur Darri-Björgvin 1-0

Fyrst lauk skák ungu mannanna, Vals Darro og Björgvins, enda ekkert verið að eyða óþarfa tíma í vangaveltur. Báðir áttu þó góða spretti. Björgvin (sem er yngstur keppenda á þessu móti, f. 2015), fékk gott tafl með svörtu og sem jélt langt inn í miðtafl. Þá varð vanmat hans á viðvkæmri kónsstöðu honum að falli og ValDari náði óverjandi kóngssókn. 
Sömmu síðar lék Benedikt hinn hörgdælski af sér manni gegn Benedikt úr Staðarbyggðinni og lagði hann þá niður vopn samstundis. Hér voru benediktar ekkert að tvínóna við hlutina. 
Tobias fékk snemma yfirburðastöðu gegn Karli. Fyrst vann hann peð og náði svo með snoturri færslu að véla peð af abdstæðingnum. Það skilja tæp sjötíu ár þessar kempur að í aldri og sá eldri e.t.v. farinn að þreytast, endacverið hálflasinn hálft mótið. Sá yngri lét hinsvegar kné fylgja kviði og nýtti sér liðsmuninn. Tveir stórhættulegur frelsingjar var meira en karlinn réði við.
Um svipað leyti lauk skák yngissveinanna Baldurs og Sigþórs þar sem tvö samstæð peð hins síðarnefnda reyndust hinum hvíta áss of erfið viðureignar. Með tvær drottningar gegn einni náði Sigþór að knýja fram sigur.
Stefán og Markús mættust í sannkölluðum toppslag. Þar var stigið þungt til jarðar, eins og oftast í skákum hins fyrrnefnda; en hann þurfti nauðsynlega á vinningi að halda til að eiga raunhæfa möguleika á Akureyrarmeistaratitlinum, (en hann á einn slíkan í pokahorninu frá því á sjöunda áratugnum!). Sóknartilburðir hans á kóngsvæng báru þó ekki tilætlaðan og en það gerði hinsvegar gagnsókn Markúsar á hinum vængnum og því fór sem fór.
Lengst varð skák sundkappanna Sigurðar og Eymundar. Sá síðarnefndi leitaði í smiðju Vignis Vatnars við undirbúning og fékk afbragðstafl með svörtu, vann peð og svo annað. Þá voru aðeins þungu mennirnir eftir á borðinu og flestöll peðin ennþá hérna megin. Eymundur var nú orðinn tæpur á tíma og fann ekki öruggt framhald, þannig að félagarnir þráléku og jafntefli varð því niðurstaðan. 

Akureyrarmeistarinn frá því í fyrra er því í óskastöðu fyrir lokaumferðina með vinningsforskot, fimm vinninga efstir sex skákir. Þeir Smári og Sigurður koma næstir honum og gætu náð honum ef Markúsi fatast flugið. Annars má sjá stöðuna hér á chess-results.
Í lokaumferðinni eigast þessir við:
Eymundur og Markús
Stefán og Smári
Sigurpur og Tobias
Karl og Valur Darri
Benedikt og Baldur

lokaumferðin hefst kl. 13 á sunnudaginn, 2. febrúar. 


*