Skýrsla formanns fyrir aðalfund

Skýrsla Skáksfélags Akureyrar starfsárið 2023-2024.

 

Starfsárið reiknast frá aðalfundi til aðalfundar, sem skv. lögum skal halda í septembermánuði.  Stjórn félagsins þetta starfsár var þannig skipuð:  Áskell Örn Kárason (form.) Rúnar Sigurpálsson, (varaform.), Smári Ólafsson (gjaldk.), Andri Freyr Björgvinsson (ritari), Stefán Bergsson og Óskar Jensson. Stjórnin var endurkjörin óbreytt frá fyrra starfsári.

Ársskýrsla þessi er samhljóða þeirri sem lögð var fram á aðalfundi félagsins þann 26. september sl. að öðru leyti en því að sleppt er nákvæmri upptalningu á einstökum skákmótum og úrslitum þeirra.

 

Inngangur

Starf félagsins á árinu dró nokkurn dám af því að flytja þurfti starfsemina í janúarmánuði úr   Skákheimilinu í Íþróttahöllinni, sem það hefur um árabil leigt af Akureyrarbæ. Aðstaðan var farin að láta nokkuð á sjá og nýttist ekki sem skyldi. Mótahald og æfingar á vormisseri fluttust því á aðstöðu á neðstu hæð Rósenborgar og þrengdi þessi breyting nokkuð að starfseminni, þótt þessi lausn væri viðunandi sem bráðabirgðaráðstöfun.  Félagið gat svo flutt á ný í Skákheimilið á maílok og er óhætt að segja að þær breytingar sem gerðar voru á aðstöðunni eru til mikilla bóta.  Skáksalur og aðstaða til varðveislu skákminja og bókasafns hefur tekið miklum framförum og allt húsnæðið endurnýjað og fært til nútímahorfs. Við félagsmenn þökkum leigusalanum fyrir snöfurleg viðbrögð við beiðni okkar um endurbætur á húsnæðinu.
Að þessu frátöldu má segja að starfið hafi verið nokkuð með hefðbundnu sniði.  Það er ákveðið áhyggjuefni að almenn þátttaka í skákmótum er nú heldur lakari en var fyrr á árum. Hinsvegar hefur barna- og unglingastarfið verið líflegt og má segja að æskulýðsstarfsemin sé viðamesti þátturinn í félagsstarfinu. Það er í sjálfu sér jákvætt og færir okkur um  leið það verkefni að bjóða uppvaxandi skákmönnum verðug verkefni til að þroska sig og efla, svo skáklífið hér í bæ megi njóta krafta uppvaxandi kynslóðar.

 

Skákmót og félagsstarf.

Hér á eftir verður greint frá helstu mótum félagsins á starfsárinu, fyrir utan sérstök barna- og unglingamót, sem fjallað verður um í sérstökum kafla.  

Mótadagskrá var hefðbundin á haustmisseri 2023 og hófst með Startmótinu þann 7. september. Síðan tók við haustmótið, sem er hið árlega meistaramót félagsins. Þar voru keppendur 14 talsins og lauk því með sigri Andra Freys Björgvinssonar.  Mótið tók rúman mánuð og lauk um miðjan október.  Rúmlega vikuhlé var gert á mótinu vegna þátttöku félagsins í Evrópumóti skákfélaga sem greint verður frá síðar.

Önnur mót á haustmisseri voru hausthraðskákmótið, Atskákmót Akureyrar, Boðsmótið, Jólahraðskákmótið og Hverfakeppnin, auk syrpu hraðskákmóta sem haldin var í nóvember og desember. Alls 20 taflfundir frá septemberbyrjun til ársloka. Keppendur á hverju móti voru frá sjö og upp í 18 þegar flest var.

Á nýju ári hófst starfið með hinu hefðbundna nýjársmóti á nýjársdag og síðan tók við Skákþing Akureyrar (hið 87. í röðinni), þann 14. janúar. Tólf keppendur mættu til leiks og voru tefldar sjö umferðir. Mótinu lauk 9. febrúar með sigri Markúsar Orra Óskarssonar sem þar með varð yngsti Skákmeistari Akureyrar frá upphafi, tæplega 15 ára gamall.
Af öðrum mótum má nefna Hraðskákmót Akureyrar, Bikarmótið og Páskahraðskákmótið, auk fjölmargra styttri hraðskákmóta. Alls teljast taflfundir vormisseris 24 talsins.
Að venju var lítið um skákmótahald yfir sumarmánuðina þrjá og var látið nægja að halda eitt hraðskákmót í hverjum mánuði, júní, júlí og ágúst.
Alls teljast því almennir taflfundir (einstök mót og umferðir í mótum sem ná yfir fleiri daga) hafa verið 47 á starfsárinu.

 

Að venju tók félagið þátt í Íslandsmóti skákfélaga og sendi þrjár sveitir til keppni, A- sveit í 1. deild, B-sveitir í 2. deild og C-sveit í 4. deild. Er skemmst frá því að segja að B- og C-sveitirnar unnu sig báðar upp um deild og verður félagið því með tvær sveitir í 1. deild (næstefstu deild) á næsta keppnistímabili.
Þá tók félagið þátt í Evrópukeppni skákfélaga sem haldin var í Durrës í Albaníu í lok september 2023 og hafnaði þar rétt fyrir neðan miðju í mjög sterku móti.

 

 

Barna- og unglingastarf

Þessi þáttur félagsstarfsins hefur smám saman farið vaxandi og er nú í að verða þungamiðjan í starfi félagsins. Fastar æfingar eru frá upphafi skólaárs að hausti til maíloka. Voru að jafnaði haldnar þrjár æfingar í viku; ein í almennum flokki (yngri börn) og tvær í framhaldsflokki.  Alls voru haldnar 97 skákæfingar á starfsárinu og voru skráðir iðkendur í báðum flokkum voru 44, sem er nokkur fækkun frá fyrra ári, þegar mikil aukning varð á þátttöku á vormisseri.

Þá voru á vegum félagsins haldnar reglulegar skákæfingar í þremur grunnskólum á Akureyri. Má ætla að um tvöhundruð börn hafi fengið skákkennslu með þessum hætti, frá þriðja til sjötta bekk.  Skákkennsla og þjálfun á starfsárinu náði því til u.þ.b. 250 barna á grunnskóla-aldri, en flestir iðkendur eru 8-11 ára gamlir.
Í þessu samhengi er rétt að nefna að félagið hafði umsjón með þátttöku þriggja sveita á Íslandsmótum skólasveita á vormisseri; sveitir frá Lundarskóla og Brekkuskóla tóku þátt í Íslandsmóti stúlknasveita í Kópavogi í janúar og sveit frá Brekkuskóla í Íslandsmóti grunnskólasveita í Reykjavík í apríl. 

Ungum iðkendum er frjálst að taka þátt í öllum almennum mótum félagsins (sem greint var frá hér á undan) og nýta þau sér það að einhverju leyti. Einnig var haldinn nokkur fjöldi sérstakra barnamóta og eru þessi helst: 
Haustmót barna í október, jólapakkamót í desember, Skákþing Akureyrar í yngri flokkum í febrúar, auk sk. „mánaðarmóta“ á vormisseri, fimm talsins.
Þá stóð félagið að Svæðismóti í skólaskák (fyrir Norðurland eystra) í apríl, svo og fyrir Landsmóti í skólaskák þann 4-5. maí; bæði mótin í samvinnu við Skáksamband Íslands. Í síðarnefnda mótinu tóku þátt 36 börn úr grunnskólum frá öllum landshlutum og tefldu um þrjá landsmeistaratitla í aldursskiptu móti. Það heyrði til tíðinda að Akureyrarmeistarinn Markús Orri Óskarsson úr Síðuskóla varð landsmeistari í elsta flokki (8-10. bekk). Má geta þess að Markús var valinn til að keppa fyrir Íslands hönd á tveimur alþjóðlegum unglingamótum; Evrópumóti unglinga sem fram fór á Ítalíu í apríl og Heimsmeistaramóti unglinga sem háð var í Prag í ágústmánuði.

Áskell Örn Kárason, formaður Skákfélags Akureyrar.