Rúnar vann startmótið

Hið víðfræga startmót Skákfélagsins, sem markar upphaf nýrrar skáktíðar að hausti fór fram í dag, síðasta dag ágústmánaðar. Tíu keppendur mættu til leiks, fimm stútungskarlar og fimm upprennandi ungmenni. Í þetta sinn veittist þeim eldri heldur betur. 

Varaformaður félagsins, Rúnar Sigurpálsson vann mótið nokkuð örugglega; fékk 8,5 vinning úr níu skákum. Næstur honum kom formaðurinn, Áskell Örn með 8 vinninga, en gjaldkerinn Smári Ólafsson hreppti bronsið með 7. Af yngissveinum veittist Nökkva Má Valssyni best, en hann fékk 3,5 vinninga. Mótstöfluna má sjá á chess-results.

Sumarið var með rólegasta móti hjá okkur að venju, en þó voru haldin hraðskákmót í hverjum mánuði, júní, júlí og ágúst.
Akureyrarmeistarinn Markús Orri Óskarsson vann öll mótin þrjú en Áskell Örn kom Þá hæla honum í öll skiptin. Þá lenti Sigurður Eiríksson í þriðja sæti á öllum mótunum, þannig að hinn sanni stöðugleiki ríkti á þessum sumarmótum.

Nú hefst svo baráttan fyrir alvöru með Skákþingi Norðlendinga um næstu helgi.