Skýrsla formanns fyrir starfsárið 2023-24

Inngangur

Nýliðið skákár 2023-2024 einkenndist nokkuð af því að félagið þurfti að víkja um nokkurra mánaða skeið úr Skákheimilinu í Íþróttahöllinnu, sem það hefur um árabil leigt af Akureyrarbæ. Aðstaðan var farin að láta nokkuð á sjá og nýttist ekki sem skyldi fyrir starfsemina. Mótahald og æfingar mestallt vormisserið fluttust því í aðstöðu á neðstu hæð Rósenborgar og þrengdi þessi breyting nokkuð að starfseminni, þótt þessi lausn væri viðunandi sem bráðabirgðaráðstöfun.  Reglulegt skákstarf fór þó að mestu fram skv. áætlun. Félagið gat svo flutt á ný í Skákheimilið á maílok og er óhætt að segja að þær breytingar sem gerðar voru á aðstöðunni eru til mikilla bóta.  Skáksalur og aðstaða til varðveislu skákminja og bókasafns hefur tekið miklum framförum og allt húsnæðið endurnýjað og fært til nútímahorfs. Við félagsmenn þökkum leigusalanum snöfurleg viðbrögð við beiðni okkar um endurbætur á húsnæðinu.
Að þessu frátöldu má segja að starfið hafi verið nokkuð með hefðbundnu sniði.  Það er visst áhyggjuefni að almenn þátttaka í skákmótum er nú heldur lakari en var fyrr á árum. Hinsvegar hefur barna- og unglingastarfið verið líflegt og má því segja að æskulýðsstarfsemin sé viðamesti þátturinn í félagsstarfinu. Það er í sjálfu sér jákvætt og færir okkur um  leið það verkefni að bjóða uppvaxandi skákmönnum verðug verkefni til að þroska sig og efla svo skáklífið hér í bæ megi njóta krafta uppvaxandi kynslóðar.

 

Skákmót og félagsstarf.

Hér á eftir verður greint frá helstu mótum félagsins á starfsárinu, fyrir utan sérstök barna- og unglingamót, sem fjallað verður um í sérstökum kafla.

Startmótið 2023 fór fram 7. september. Níu mættu til leiks, Símon Þórhallsson sigraði. Mótið var haldið að loknum aðalfundi félagsins, þar sem fráfarandi stjórn var öll endurkjörin. Hana skipa Áskell Örn Kárason (form.) Rúnar Sigurpálsson, (varaform.), Smári Ólafsson (gjaldk.), Andri Freyr Björgvinsson (ritari), Stefán Bergsson og Óskar Jensson.

Haustmótið hófst 17. september og voru keppendur 14 og tefldu sjö umferðir skv. svissnesku kerfi. Mótið tók rúman mánuð, enda þurfti tvisvar að gera hlé á því vegna annarra móta. Sigurvegari (og um leið félagsmeistari) var Andri Freyr Björgvinsson. Hann fékk sex vinninga af sjö mögulegum, vinningi meira en næstu menn, Sigurður Eiríksson, Markús Orri Óskarsson og Eymundur Eymundsson.

Hausthraðskákmótinu 29. október lauk með sigri Símonar Þórhallssonar.  Keppendur voru átta.

Atskákmót Akureyrar var háð dagana 29-30.nóvember. Keppendur voru 8 talsins og tefldu allir við alla.  Áskell Örn Kárason bar sigur úr býtum, fékk hálfum vinningi meira en Sigurður Eiríksson og Smári Ólafsson.  Er þetta reyndar sama röð og var á mótinu 2022. Markús Orri Óskarsson varð efstur yngri keppenda (f. 2008 og síðar).

Félagið efndi til Boðsmóts í nóvemner og desember fyrir keppendur undir 1800 skákstigum. Nýjung sem nú er reynd í fyrsta sinn. Tefldar voru sjö umferðir og fyrirkomulag nokkuð frjálslegt; keppendur gátu valið um að tefla frá einni skák upp í allar sjö. Hálfur vinningur var gefin fyrir yfirsetu. Í lokin stóð Markús Orri Óskarsson uppi sem sigurvegari; hann vann allar fjórar skákirnar sem hann tefldi kom í mark með 5,5 vinninga; hálfum á undan Stefáni G Jónssyni og Val Darra Ásgrímssyni. Mótið var ekki síst til þess hugsað að gefa ungum og stigalausum iðkendum tækifæri til þess að tefla „alvöru“ kappskákir og eiga von um að komast inn á stigalista FIDE. Það markmið náðist með ágætum.

Átján keppendur mættu til leiks á jólahraðskákmóti félagsins sem haldið var á Kaffi Lyst þann 27. desember. Tefldar voru níu umferðir og bar Símon Þórhallsson sigur úr býtum með 8 vinninga, vinningi á undan Rúnari Sigurpálssyni.

Þann 29. desember var hin hefðbundna hverfakeppni haldin. Í stað þess að skipta í sveitir eftir búsetu var einvaldur ráðinn til að skipta mönnum í sveitir, sem fengu hin jólalegu nöfn „Skyrgámar“ og „Ketkrókar“. Tefld var bændaglíma, tvöföld umferð, en sex menn skipuðu hvora sveit. Eftir harða keppni náðu Skyrgámar að landa sigri, fengu 39 vinningar gegn 33 vinningum Ketkrókanna.   Var þetta síðasta mót ársins 2023.

Með nýju ári hófst Skákþing Akureyrar (hið 87. í röðinni!) þann 14. janúar. Tólf keppendur voru skráðir til leiks og tefldu sjö umferðir. Markús Orri Óskarsson vann allar sínar skákir og varð Skákmeistari Akureyrar, tæplega 15 ára gamall. Varð hann heilum tveimur vinningum á undan silfurverðlaunahafanum, Stefáni G. Jónssyni. 

Á Hraðskákmót Akureyrar mættu níu keppendur og lauk því með sigri Símonar Þórhallssonar.  Símon var sigursæll á hraðskákmótum vetrarins og bætti enn við sigri með því að vinna Páskahraðskákmótið á skírdag.

Skákþing Akureyrar í yngri flokkum var háð dagana 24. og 25.febrúar. 11 börn mættu til keppni og tefldu sjö umferðir með atskákarfyrirkomulagi (10-3) um tvo meistaratitla, í unglingaflokki (f. 2008-2012) og í barnaflokki (f. 2013 og síðar). Sigþór Árni Sigurgeirsson vann mótið með sex vinningum (og unglingaflokkinn um leið). Akureyrarmeistari í barnaflokki varð Viacheslav Kramarenko, sem náði öðru sæti og fékk fimm vinninga. 

Eins og fyrra ár voru haldið þrjú sumarmót um hábjargræðistímann, eitt í hverjum mánuði. Tefld var hraðskák. Þátttaka í þessum mótum var hæfilega mikil, sex til átta manns. Áskell Örn Kárason vann öll mótin.

 

Barna- og unglingastarf

Þessi þáttur hefur smám saman farið vaxandi og stefnir nú í að verða þungamiðjan í starfi félagsins. Fastar æfingar eru frá upphafi skólaárs að hausti til maíloka. Voru að jafnaði haldnar þrjár æfingar í viku; ein í almennum flokki (yngri börn) og tvær í framhaldsflokki.  Alls voru haldnar 97 skákæfingar á starfsárinu og voru skráðir iðkendur í báðum flokkum 44, sem er nokkur fækkun frá fyrra ári, þegar mikil aukning varð á þátttöku á vormisseri.

Þá voru á vegum félagsins haldnar reglulegar skákæfingar í þremur grunnskólum á Akureyri. Má ætla að um tvöhundruð börn hafi fengið skákennslu með þessum hætti, frá þriðja til sjötta bekk.  

Ungum iðkendum er frjálst að taka þátt í öllum almennum mótum félagsins og nýta þau sér það að einhverju leyti. Einnig var haldinn nokkur fjöldi sérstakra barnamóta. Þar má telja, s.k. mánaðarmót, haldin frá október fram í maí, eitt mót á mánuði. Hið fjölmennasta þessara móta var Jólapakkamótið þann 15. desember, með 23 þátttakendum.  Þegar mánaðarmótin á vormisseri voru talin saman hafði Sigþór Árni Sigurgeirsson safnað flestum vinningum á þessum fimm mótum. Hann vann einnig sigur á hinu árlega Vormóti, sem markaði lok æfinga- og keppnistímabils að vori. Var það fyrsta mótið sem haldið var í hinu nýuppgerða Skákheimili í Íþróttahöllinni.
Félagið stóð einnig að Svæðismóti í skólaskák í samvinnu við Skáksamband Íslands. Alls mættu 35 börn til leiks á þessu móti, úr sjö grunnskólum á Norðurlandi eystra. Sigurvegari í yngsta flokki, (1-4. bekk), varð Gabríel Máni Jónsson úr Oddeyrarskóla, í flokki 5-7. bekkjar bar Sigþór Árni Sigurgeirsson úr sama skóla sigur úr býtum og í flokki 8-10. bekkjar Markús Orri Óskarsson úr Síðuskóla. Þessir keppendur unnu sér allir rétt til þátttöku á Landsmóti í skólaskák sem háð var hér á Akureyri 4-5. maí sl. Þar voru mætt til leiks 36 börn víðsvegar að af landinu, 12 í hverjum aldursflokki. Í elsta flokknum náði Markús Orri þeim glæsilega árangri að verða í 1-2. sæti eftir 11 umferðir og tókst svo að sigra andstæðing sinn, Mikael Bjarka Heiðarsson úr Vatnsendaskóla í úrslitaeinvígi. Kóróneraði hann þar glæsilegan árangur sinn á þessu skákári.

Tveir aðrir Akureyringar tóku þátt í elsta flokknum og stóðu vel fyrir sínu, þeir Tobias Matharel og Baldur Thoroddsen. Sigþór Árni keppti svo í miðflokknum ásamt Agli Ásberg Magnasyni og í yngsta flokki þeir Gabríel Máni og Skírnir Hjaltason.  Fengu allir þessir piltar mikilvæga reynslu af þátttöku í starku ungmennamóti sem þeir vonandi búa að í áframhaldinu.

 

Þátttaka í öðrum mótum.

Fimm af okkar iðkendum tóku þátt í Íslandsmóti ungmenna (8-16 ára) sem haldið var í Garðabæ í nóvembermánuði. Þar tefldi Markús Orri í flokki u14, Sigþór Árni og Valur Darri Ásgrímsson í flokki u12 og Gabríel Máni og Skírnir í flokki u8. Allir stóðu sig með prýði og var Gabríel aðeins hársbreidd frá því að hreppa verðlaunasæti.

Akureyrarmeistarinn ungi, Markús Orri Óskarsson var iðinn við kolann á árinu, enda valinn til að keppa fyrir Íslands hönd á heimsmeistara- og Evrópumótum unglinga. Fyrrnefnda mótið var á Ítalíu seint í nóvember og tefldi hann þar í flokki u14. Evrópumótið var svo haldið í Prag nú í ágúst og þá var Markús kominn upp í flokk u16. Á báðum mótum glímdi hann við sterka andstæðinga og bar stundum minna úr býtum en bjó í stöðunni. Hann hafnaði rétt fyrir neðan miðju í báðum þessum mótum með tæplega 50% vinninga. Verður sá árangur að teljast ásættanlegur og víst að þessi eldskírn kemur honum til góða í framtíðinni.
Í október hélt sveit félagsins til Durrës í Albaníu til þátttöku á Evrópumóti skákfélaga og var nú teflt á því móti í annað sinn.  Teflt var á sex borðum og vann sveitin tvær viðureignir af sjö og hélt jöfnu í tveimur til viðbótar; fékk 17 vinninga af 36 mögulegum og hafnaði rétt fyrir neðan miðju í móti þar sem flestir af sterkustu skákmönnum Evrópu voru meðal keppanda, m.a. Magnús nokkur Carlsen. Sveit SA skipuðu þeir Rúnar Sigurpálsson, Halldór Brynjar Halldórsson, Stefán Bergsson, Arnar Þorsteinsson, Andri Freyr Björgvinsson, Mikael Jóhann Karlsson, Áskell Örn Kárason og Haraldur Haraldsson.

Að venju tók félagið þátt í Íslandsmóti Skákfélaga og sendi þrjár sveitir til keppni. A-sveitin tefldi í 1. deild og var hálfum vinning frá því að vinna sér sæti í Úrvalsdeild. B-sveitin hafnaði í öðru sæti í 2. deild og vann sig upp um deild, þannig að félagið teflir fram tveimur sveitum í 1. deild á því tímabili sem nú er að hefjast.  C-sveitin varð sömuleiðis í öðru sæti í 4. deild og fluttist einnig upp um deild.

Stefnt er að því að félagið sendi fjórar sveitir á Íslandsmótið sem hefst innan skamms.

 

 

Fundargerð aðalfundar 2023: