Skýrsla formanns um mót og æfingar á nýliðnu starfsári

Inngangur

Nýliðið skákár 2022-2023 var félaginu á margan hátt hagfellt. Takmarkanir vegna sóttvarna sem höfðu verið okkur fjötur um fót eru nú að baki svo mót og æfingar gátu nú gengið eðlilega fyrir sig. Þátttaka á skákmótum hefur reyndar ekki náð fyrri hæðum, en ekkert frekara hrap orðið á því sviði. Gleðilegustu tíðindin eru þó þau að barna- og unglingaæfingar voru mun betur sóttar en undanfarin ár, einkum á vormisseri 2023. Hið sama á við um þátttöku á skákmótum fyrir yngri iðkendur. Með sama áframhaldi getum við horft með björtum augum til framtíðar. Vonir standa m.a. til þess að unga fólkið sýni sig í auknum mæli í hinu almenna skákstarfi, s.s. með þátttöku í mótum auk þess sem okkar fulltrúar munu vonandi halda áfram að láta til sín taka á ungmennamótum á landsvísu.
Talning á þátttakendum á mótum á vegum félagsins, svo og þeim sem teflt hafa fyrir hönd félagsins í sveitakeppnum, leiðir í ljós að við sögu komu 109 manns. 
Á félagaskrá eru nú 85 manns. 

 

Helstu mót

Startmótið 2022 fór fram 11. september. Þátttaka var með minnsta móti í þetta sinn, en sex keppendur tefldu tvöfalda umferð.  Rúnar Sigurpálsson og Áskell Örn Kárason urðu efstir með 7,5 vinning í 10 skákum.

Haustmótið hófst 22. september og voru keppendur 12 talsins eins og árið áður.  Fyrirkomulag mótsins var nokkur nýlunda, en það var teflt á fjórum dögum. Mótið hófst á fimmtudegi með tveimur atskákum; næstu daga voru tefldar fjórar kappskákir og lauk mótinu á sunnudegi. Áskell Örn Kárason varð efstur með 5,5 vinning og því skákmeistari SA.  Andri Freyr Björgvinsson varð annar með fimm vinninga og Elsa María Kristínardóttir þriðja með fjóra.
Í yngri flokki urðu Tobias Matharel og Brimir Skírnisson efstir með þrjá vinninga. Tobias varð meistari eftir að hafa unnið tveggja skáka einvígi þeirra um titilinn.

Hausthraðskákmótinu 23. október lauk með sigri Rúnars Sigurpálssonar.  Keppendur voru átta talsins.

Atskákmót Akureyrar var háð dagana 20-21.nóvember. Keppendur voru 10 talsins og tefldar sex umferðir.  Áskell Örn Kárason bar sigur úr býtum, annar varð Sigurður Eiríksson og Smári Ólafsson þriðji.  Tobias Matharel varð efstur í yngri flokki (keppendur f. 2007 og síðar).

Sautján keppendur mættu til leiks á jólahraðskákmóti félagsins sem haldið var á Kaffi Lyst þann 29. desember. Tefldar voru níu umferðir og urðu þeir Rúnar Sigurpálsson og Andri Freyr Björgvinsson efstir með 7,5 vinning hvor.

Daginn eftir var hin víðfræga hverfakeppni haldin. Skipt var í tvær sveitir eftir búsetu.  Eftir spennandi (en ójafna) keppni sigraði sveit skipuð keppendum með heimilisfesti norðan Hrafnagilsstrætis sveit keppenda úr suðurhlutanum með 28 vinningum gegn 12. Tefld var bændaglíma í hraðskák. Var þetta síðasta mót ársins 2022.

Með nýju ári hófst Skákþing Akureyrar þann 22. janúar og mættu þrettán keppendur til leiks. Þetta mót var hið 86. í röðinni og tefldar sjö umferðir. Því lauk með sigri Rúnars Sigurpálssonar, sem þar með hreppti titilinn „Skákmeistari Akureyrar“ þriðja árið í röð. Rúnar fékk 6,5 vinning í sjö skákum, en næstir komu þeir Áskell Örn Kárason og Sigurður Eiríksson með fimm vinninga.
Rúnar varð einnig Akureyrarmeistari í hraðskák eftir sigur á Hraðskákmóti Akureyrar þann 5. mars, vann alla andstæðinga sína, 11 talsins.

Páskahraðskákmótið fór fram á skírdag, 6. apríl. Rúmlega 20 keppendur mættu til leiks. Rúnar sigurpálsson sigraði eins og á flestum hraðskákmótum um þessar mundir.

Skákþing Akureyrar í yngri flokkum var háð dagana 11. og 12. mars. Þátttaka var mjög góð og mættu 20 börn til keppni. Tefldar voru sjö umferðir með atskákarfyrirkomulagi (8-3) um tvo meistaratitla, í unglingaflokki (f. 2007-2011) og í barnaflokki (f. 2012 og síðar). Fóru leikar svo að Markús Orri Óskarsson vann allar sínar skákir og unglingaflokkinn um leið, en Valur Darri Ásgrímsson varð hlutskarpastur í barnaflokki, fékk 4 vinninga.

Félagið stóð svo fyrir Skákþingi Norðlendinga dagana 14-16. apríl. Þátttaka var geysigóð og skráðu sig 32 keppendur til leiks. Í þetta sinn voru tefldar atskákir á mótinu (15-10), alls níu umferðir. Eftir jafna og æsispennandi keppni stóð Elsa María Kristínardóttir uppi sem sigurvegari með sjö vinninga. Mun þetta var í fyrsta skipti í 88 ára sögu þessa móts sem kona hampar meistaratitlinum. Jafnmarga vinninga hlaut Stefán Bergsson sem varð í öðru sæti, en þriðji varð fráfarandi meistari, Þórleifur Karl Karlsson með sex vinninga.  Í unglingaflokki (f. 2007) varð Sigurbjörn Hermannsson efstur með 5,5 vinning,  en heimamennirnir þeir Sigþór Árni Sigurgeirsson og Markús Orri Óskarsson fengu hálfum vinningi minna. Hreppti Sigþór titilinn í unglingaflokki vegna betri oddastiga en Markús.
Þórleifur Karl vann svo Hraðskákmót Norðlendinga og þann meistaratitil sem því fylgir.  

Bikarmótið var teflt dagana 4. og 11. maí. Um er að ræða útsláttarmót þar sem keppendur falla úr leik eftir þrjú töp. Tefldar voru atskákir. Rúnar Sigurpálsson vann þetta mót örugglega, taplaus.

Mótaröð. Á vormisseri var efnt til mótaraðar í hraðskák. Hún samanstóð af átta mótum; hið fyrsta var haldið 12.janúar, það áttunda 27. apríl. Keppt var um það að ná saman sem flestum vinningum. Þegar upp var staðið hafði Áskell Örn Kárason afar naumt forskot á Sigurð Eiríksson, fékk hálfum vinningi meira en sá síðarnefndi, alls 49.    

Um hábjargræðistímann voru haldin þrjú sumarmót, eitt í hverjum mánuði. Tefld var hraðskák. Á júnímótinu mættu sjö til leiks, það vann Markús Orri Óskarsson. Á júlímótinu urðu Símon Þórhallsson og Áskell Örn Kárason jafnir og efstir af 11 þátttakendurm, en Símon vann svo ágústmótið einn, þar mættu níu.

 

Að venju tók félagið þátt í Íslandsmóti Skákfélaga og sendi nú þrjár sveitir til keppni. A- og B-sveitirnar tefldu í 1. deild og vegnaði misvel. A-sveitin var í toppbaráttu og hafnaði að lokum í öðru sæti. B-sveitin átti hinsvegar við ramman reip að draga og varð að sætta sig við fall í aðra deild. Sömu örlög biðu C-sveitar félagsins, sem féll úr þriðju deild í þá fjórðu. Óvenjuerfitt var að ná saman sveitum í þetta sinn,  (mikið um forföll),  og gengur vonandi betur næst.
Þá ber að nefna að Skákfélagið sendi nú í fyrsta sinn sveit til keppni á Evrópumóti skákfélaga, sem haldið var í Mayrhofen í Austurríki í októberbyrjun. Vitað var að sveitin myndi þurfa að berjast á neðri helmingi mótsins, enda margar afar sterkar sveitir sem þarna mættu til leiks. Sveitin endaði að lokum í 61. sæti af 70. Fyrir félagið tefldu þeir Jón Kristinn Þorgeirsson, Rúnar Sigurpálsson, Arnar Þorsteinsson, Áskell Örn Kárason, Andri Freyr Björgvinsson og Haraldur Haraldsson.  Andri Freyr náði bestum árangri liðsmanna; fékk fjóra vinninga í sex skákum.  

 

Barna- og unglingastarf

Þessi þáttur félagsstarfsins var með allra blómlegasta móti á nýliðnu starfsári. Frá septemberbyrjun og til maíloka voru að jafnaði haldnar þrjár æfingar í viku; ein í almennum flokki (yngri börn) og tvær í framhaldsflokki.  Á haustmisseri voru haldnar og 44 æfingar og 54 á vormisseri.  Skráðir iðkendur í báðum flokkum voru 58, en sumir voru vissulega virkari en aðrir. Aðsókn jókst mikið á vormisserinu og má segja að þá hafi u.þ.b. 14-16 barna kjarni sótt æfingarnar reglulega í báðum flokkum.   
Á vegum félagsins voru einnig reglulegar skákæfingar í fjórum grunnskólum á Akureyri og líka að Hrafnagili í samvinnu við Ungmennafélagið Samherja. Má ætla að um tvöhundruð börn hafi fengið skákennslu með þessum hætti, frá þriðja bekk upp í þann sjöunda, en aðeins misjafnt var eftir skólum hvaða árgangar fengu þessa kennslu.

Þá var haldin röð barnamóta á vormisseri, eitt mót á mánuði frá janúar og fram í maí.  Sigurvegari í hópi eldri barna (f. 2007 og fyrr) varð Markús Orri Óskarsson sem reyndar var efstur á öllum mótunum. Í flokki yngri barna var Vjatsjeslav Kramarenko hlutskarpastur. Þátttaka var góð í þessum mótum, rúmlega 20 keppendur þegar best lét. Síðasta mótið í röðinni, sem háð var hinn 13. maí var jafnframt Svæðismót í skólaskák fyrir Norðurland eystra og komu þá til keppni nokkrir nemendur í skólum utan Akureyrar. Í þetta sinn var mótið þrískipt skv. aldursflokkum skólaskákarinnar. Í yngsta flokki (1-4. bekkur), sigraði áðurnefndur Vjatsjeslav Kramarenko,  nemandi í Lundarskóla. Í næsta flokki (5-7. bekkur) bar Sigþór Árni Sigurgeirsson úr Oddeyrarskóla sigur úr býtum og í elsta flokknum sigraði Markús Orri Óskarsson úr Síðuskóla. Þessir þrír unnu sér rétt til keppni á Landsmóti í skólaskák sem haldið var í Kópavogi dagana 11-12. júní. Auk þeirra var Einar Ernir Eyþórsson úr Brekkuskóla, sem varð annar í miðstigsflokknum,  valinn til keppni á mótinu. Segja má að allir akureyrsku keppendurnir hafi staðið sig með sóma. Markús og Sigþór voru lengi vel að berjast um verðlaunasæti, en enduðu ekki nógu vel til að ná slíku sæti. Vjatsjeslav og Einar voru báðir að tefla á sínu fyrsta „stórmóti“ og stóðu sig að vonum. Sá fyrrnefndi varð í miðjum hópi í yngsta flokki, en sá síðarnefndi aðeins fyrir neðan miðju í miðstigsflokknum. Mikil og dýrmæt reynsla fyrir þá báða.
Þá er þess ógetið að þeir Tobias Þórarinn Matharel og Sigþór Árni Sigurgeirsson voru valdir til að keppa fyrir Íslands hönd í fimm landa sveitakeppni á Írlandi í apríl og fengu þar dýrmæta reynslu í keppni af því tagi, þótt þeir ynnu ekki til verðlauna.

 Áskell Örn Kárason, formaður Skákfélags Akureyrar. 

Skrár tengdar þessari bloggfærslu:

• a_alfundur_skakfelags_akureyrar_11_september_2022.docx