Skýrsla formanns fyrir aðalfund 2022

Inngangur

Félagsstarfið á nýliðnu skákári 2021-2022, bar þess nokkur merki að kórónaveiran herjaði á landsmenn og samkomutakmarkanir komu niður á skákmótahaldi og æfingum. Þannig þurfti að fresta bæði Haustmótinu 2021 og Skákþingi Akureyrar 2022 um nokkrar vikur. Þó tókst að ljúka báðum mótunum, en þau drógust nokkuð á langinn, einkum Skákþingið, sem stóð í rúma þrjá mánuði, ef einvígi tveggja efstu manna um sigurinn er talið með. Truflanir urðu einnig á skákæfingum barna og unglinga og aðrir taflfundir voru færri en áður. Líklega hafði þetta einhver áhrif á þátttöku í skákmótum, sem nú er heldur minni en var fyrir nokkrum árum. Er það nokkuð áhyggjuefni.  

 

Helstu mót

Startmótið 2021 fór fram 9. september. Tíu manns mættu til leiks, sigurvegari var Rúnar Sigurpálsson.

Haustmótið hófst um miðjan október; þar voru keppendur 12 talsins og kepptu allir í einum flokki, sjö umferðir. Andri Freyr Björgvinsson varð meistari félagsins þriðja árið í röð; hann vann allar sínar skákir.  Arnar Smári Signýjarson varð annar, Elsa María Kristínardóttir þriðja.
Meistari í yngri flokki varð Markús Orri Óskarsson, Tobias Matharel í öðru sæti.

Hausthraðskákmótinu 21. nóvember lauk með sigri Rúnars Sigurpálssonar.  Keppendur voru átta talsins.

Hraðskáksyrpa með fjórum mótum var haldin í nóvember og desember; þar hlaut Áskell Örn Kárason flesta vinninga samanlagt.   

Atskákmót Akureyrar var háð dagana 10. og 12. desember. Góð þátttaka var í mótinu, keppendur alls 14 talsins. Rúnar Sigurpálsson bar sigur úr býtum, annar varð Andri Freyr Björgvinsson og Smári Ólafsson þriðji.  Tefldar voru sjö umferðir eftir svissnesku kerfi.

Hefðbundin dagskrá var um jóladagana. Andri Freyr Björgvinsson sigraði á vel skipuðu jólahraðskákmóti þann 28. desember. Keppendur voru 12 talsins.

Tveimur dögum síðar var hin víðfræga hverfakeppni haldin. Skipt var í tvær sveitir eftir búsetu.  Eftir jafna og spennandi keppni sigraði sveit skipuð keppendum með heimilisfesti norðan Þingvallastrætis sveit keppenda sunnan úr suðurhlutanum með 28,5 vinningum gegn 27,5. Tefld var bændaglíma í hraðskák.

Nýjársmótið 2022 var svo haldið á nýjársdag að venju. Þar varð Áskell Örn Kárason efstur í hópi sex keppenda.

Skákþing Akureyrar hófst með keppni í yngri flokkum (f. 2006 og síðar) dagana 28. og 29. janúar. Sjö keppendur mættu til leiks og tefldu atskákir með umhugsunartímanum 10-5. 
Markús Orri Óskarsson bar sigur úr býtum, fékk 5,5 vinning af sex mögulegum. Í barnaflokki (f. 2011 og síðar) varð Sigþór Árni Sigurgeirsson Akureyrarmeistari.  

Eftir frestun hófst svo keppnin um titilinn „Skákmeistari Akureyrar“ þann 30. janúar. Tíu keppendur mættu til leiks og tefldu allir við alla. Þeir Rúnar Sgurpálsson og Andri Freyr Björgvinsson tóku brátt forystuna í mótinu og komu að lokum jafnir í mark; lögðu alla aðra keppendur að velli en gerðu jafntefli í innbyrðis skák. Þeir háðu því tveggja skáka einvígi um titilinn eftirsótta og þar hafði Rúnar betur, vann seinni skákina eftir að þeirri fyrri hafði lokið með jafntefli. Þriðji í mótinu varð Stefán G. Jónsson.  

BSO-mótið fór fram 11. maí og lauk með sigri Andra Freys. Þar mættu sjö keppendur til leiks.

Sumarmánuðina var efnt til þriggja hraðskákmóta, eins í hverjum mánuði. Símon Þórhallsson vann júnímótið og Rúnar Sigurpálsson júlí- og ágústmótin.

Þá hélt félagið hraðskákmót þann 11. júní í samvinnu við Kaffi Lyst, þar sem teflt var. Símon Þórhallsson vann það mót.

Síðasta mót sem félagið stóð fyrir á nýafstaðinni skáktíð var afmælismót Ólafs Kristjánssonar, sem fór fram í Hofi 2-4. september sl. og var haldið í samvinnu við fjölskyldu Ólafs, sem var áttræður þann 29. ágúst. Mótið var hið glæsilegasta og fór vel fram í alla staði. Keppendur voru 33 talsins. Öruggur sigurvegari varð alþjóðlegi meistarinn Vignir Vatnar Stefánsson, sem fékk 10 vinninga af 11 mögulegum.  Efstir heimamanna urðu þeir Jón Kristinn Þorgeirsson, Rúnar Sigurpálsson og Áskell Örn Kárason. Þeir fengu 7 vinning og höfnuðu í 4-6. sæti.

 

Að venju tók félagið þátt í Íslandsmóti Skákfélaga og sendi fjórar sveitir til keppni. A-sveitin tefldi í hinni nýstofnuðu úrvalsdeild og lenti þar í kröppum dansi. Varð sveitin neðst af sex sveitum og féll í 1. deild. B-sveitin tefldi í 1. deild og var frá upphafi í hópi efstu sveita; lauk keppni í fjórða sæti af átta. C-sveitin tók þátt í 3. deild og var hársbreidd frá því að komast upp í 2. deild, hafnaði að lokum í þriðja sæti. D-sveit hóf keppni í 4. deild haustið 2021, en vegna mikilla forfalla, m.a. vegna covid tókst ekki að manna sveit í seinni mhlutanum.

Skákþing Norðlendinga var að þessu sinni haldið á Húsavík dagana 25-27. mars.  Örn Leó Jóhannsson sigraði á mótinu en Áskell Örn Kárason varð í öðru sæti og um leið efstur Norðlendinga. Er hann því Skákmeistari Norðlendinga í ár. Hálfum vinninga á eftir Áskeli urðu þeir Jón Kristinn Þorgeirsson og Símon Þórhallsson. Áskell var einnig Hraðskákmeistari Norðlendinga.

 

Barna- og unglingastarf

Eins og áður er getið varð nokkur truflun á æfingahaldi vegna samkomutakmarkana. Líklega hafði þetta einhver á hrif á ástundun og þátttöku, en heldur færri æfðu nú með félaginu en áður. Dagskráin gerði ráð fyrir einni æfingu í viku fyrir byrjendur og yngri börn, en boðið var upp á tvær æfingar vikulega í framhaldsflokki. Alls voru haldnar 43 æfingar á haustmisseri og 54 á vormisseri.

Þá voru á vegum félagsins reglulegar skákæfingar í þremur grunnskólum á Akureyri, í þriðja, fjórða og fimmta bekk. Sömuleiðis sá félagið um reglulegar æfingar fyrir börn í Hrafnagilsskóla í samvinnu við Ungmennafélagið Samherja.

 

Áskell Örn Kárason, formaður Skákfélags Akureyrar.  

 

Fundargerð síðasta aðalfundar:

 

Skrár tengdar þessari bloggfærslu:

• a_alfundur_skakfelags_akureyrar_06_09_2021_1.odt