Áskell skákmeistari Norðlendinga í fjórða sinn

Skákþing Norðlendinga, hið 88. í röðinni var háð á Húsavík um síðustu helgi. Mótið var jafnframt liður í BRIM-mótaröðinni. Alls 20 keppendur mættu til leiks. Tefldar voru sjö umferðir eftir svissnesku kerfi, fjórar atskákir á föstudegi, tvær kappaskákir á laugardegi og lokaskákin á sunnudegi. 

Örn Leó Jóhannsson sigraði á mótinu, fékk 5,5 vinninga. Áskell Örn Kárason og Gauti Páll Jónsson fengu 5 vinninga og þeir Jón Kristinn Þorgeirsson, Stefán Bergsson og Jóhann Ingvason 4,5. Heildarúrslit má sjá á Chess-results.  

Átta SA-félagar tóku þátt í mótinu, en þátttaka eyfirskra skákmanna hefur þó oft verið betri. Aðeins þeir keppendur sem eiga lögheimili á Norðurlandi geta hreppt hinn eftirsóknarverða titil "Skákmeistari Norðlendinga". Fyrir lokaumferðina var Jón Kristinn efstur Norðlendinga, en þeir Áskell og Símon, sem telfdu sín á milli,  áttu líka möguleika á titlinum. Þegar Jón Kristinn laut í lægra haldi fyrir Jóhanni Ingvasyni varð skák þeirra félaga að hreinni úrslitaskák um titilinn. Eftir miklar sviptingar náði Áskell að stýra sínu fleyi í sigurhöfn og var öðrum skákum þá löngu lokið.

Á myndinni má sjá þrjá efstu Norðlendingana, frá vinstri, Jón Kristinn, Áskell og Símon. Í baksýn mynd Péturs Jónassonar af höfuðstað Þingeyinga. Myndina af verðlaunahöfum tók Stefán Bergsson.