Skákþing Akureyrar hafið í 85. sinn!

Keppni á Skákþingi Akureyrar hófst í gær, 30. janúar. Tíu keppendur mættu til leiks og munu tefla allir-við-alla, alls níu umferðir. Bæði ungir og gamglir taka þátt; okkur telst svo til að a.m.k. 69 ára aldursmunur sé á elsta og yngsta keppandanum. Í fyrstu umferð var útlitið svart:
Markús-Rúnar    0-1

Smári-Andri     0-1

Sigþór-Sigurður 0-1

Jökull Máni-Karl 0-1

Stefán-Eymundur  1/2

Um hríð leit út fyrir að allar skákirnar ynnust á svart! Annars vakti skák hins 10 ára gamla Sigþórs Árna við hinn sjötuga skákkappa Sigurð Eiríksson mesta athygli. Sá stutti blés snemma til sóknar og stóð um hríð til vinnings. Reynsluboltinn gerði þó sitt besta til að flækja taflið og eftir að Sigþóri sást yfir einföldustu vinningsleiðina hallaði brátt á ógæfuhliðina og sá gamli slapp með skrekkinn. En mjög vel tefld skák hjá Sigþóri lengst af. Af öðrum skákum fara minni spurnir; skák Smára og Andra lenti snemma í miklu ójafnvægi. Í sókn félaganna á sinnhvorn vænginn hafði Andri svo betur. Skák Stefán og Eymundar var lengi þung og lokuð, uns sá síðarnefndi náði að véla tvö peð af Þveræingnum. Sá fékk hinsvegar ógnandi færi í staðinn og í gagnkvæmu tímahraki og viðsjárverðri stöðu sömdu þeir félagar um jafntefli. E. Lúther stóð þá heldur betur en úrslit engan veginn ljós. 

Af öðrum skákum verður ekki sagt að sinni, en þessi fyrsta umferð Skákþingsins gefi vonir um skemmtilegt og spennandi mót. 

Önnur umferð verður tefld á fimmtudag og þá verða eftirfarandi hestar leiddir saman: 

Rúnar-Karl

Andri-Jökull Máni

Sigurður-Smári

Eymundur-Sigþór

Markús-Stefán