Skákmót Brekkuskóla - Brimir skólameistari.

Skólaskákmót Brekkuskóla - fyrir nemendur í 5-7. bekk var haldið þann 9. og 10. desember. Alls skráðu sig 27 keppendur til leiks. Fyrri daginn voru tefldar fjórar umferðir og svo þrjár umferðir til úrslita seinni daginn, en þá tefldu aðeins þeir keppendur sem höfðu náð a.m.k. tveimur vinningum fyrri daginn. Það voru því 18 keppendur sem tefldu til úrslita um þá meistaratitla sem í boði voru. 
Lok mótsins voru nokkuð dramatísk. Tobias Þórarinn Matharel úr sjöunda bekk, sem þótti sigurstranglegur fyrir mótið, vann sex fyrstu skákir sínar, en beið lægri hlut í lokaumferðiunni fyrir Fannari Bjarka Ólasyni úr sjötta bekk. Við það náði æfingafélagi Tobiasar, Brimir Skírnisson honum að vinningum. Þeir tefldu því úrslitaskák um sigurinn á mótinu og lauk henni með sigri Brimis, sem því er skákmeistari Brekkuskóla í ár. Verðlaunahafar á mótinu voru þessir:

röð	nafn	árg	vinn
1	Tobias Matharel	7	6
2	Brimir Skírnisson	7	6
3	Smári Steinn Ágústsson	7	5
	Gunnar Logi Guðrúnarson	7	5
	Baldur Thoroddsen	7	5
	Fannar Bjarki Ólason	6	5
	Hinrik Hjörleifsson	7	5
8	Stella Kristín Júlíusdóttir	5	4
	Guðrún Vala Rúnarsdóttir	6	4
	Helgi Kort Gíslason	5	4
	Egill Ásberg Magnason	5	4

Eins og sjá má urðu fimm keppendur jafnir í þriðja sæti, en af þeim var Smári Steinn hæstur á stigum (samanlagðir vinningar andstæðinga hans). Fannar Bjarki varð bekkjarmeistari sjötta bekkjar, en næst honum kom Guðrún Vala Rúnarsdóttir. Þau Stella, Helgi og Egill hlutu flesta vinninga fimmtubekkinga og fær Stella bekkjarmeistaranafnbótina þar sem hún er með fleiri stig en bekkjarbræður hennar.

Að loknu skákmótinu. Fremst sitja sigurvegararnir (frá vinstri) Fannar Bjarki, bekkjarmeistari sjötta bekkjar, Stella Kristín bekkjarmeistari fimmta bekkjar og Brimir sigurvegari mótsins.