Andri með fullt hús

Fimmtu umferð haustmótsins var að ljúka. Úrslit urðu sem hér segir:

Andri-Elsa      1-0    Andri náði snemma heldur betra tafli gegn fremur óvirkri byrjarataflmennsku Elsu. Hann náði svo að bjótast í gegn eftir d-línunni og ná mátsókn sem kostaði Elsu skiptamun og skákina skömmu síðar.

Jökull Máni-Tobías  0-1   Teflendur hrókuðu hvor á sinn vænginn. Máni var fyrri til að sækja á kóng andstæðingsins og fékk mjög góð færi eftir peðsfórn, þar sem g-línan opnaðist. Hann hirti svo peðið aftur og hélt svörtum í heljargreipum. Á örlagastundu fór hann þó út af sporinu; gaf skiptamun og missti skömmu síðar meira lið. Klaufalegt tap hjá Jökli Mána en um leið frækinn varnarsigur hjá Tobiasi.

Arnar Smári-Hilmir   1-0. Eftir rólega byrjun missti Hilmir mann og fékk ekki rönd við reist eftir það. 

Emil-Hreinn  0-1. Emil freistaðist til að fórna manni snemma í miðtaflinu en fékk litlar bætur fyrir hann. Eftirleikurinn var svo auðveldur hjá Hreini.

Sigþór-Markús  0-1.  Markús jafnaði taflið auðveldlega með svörtu og vann peð snemma í miðtaflinu. Sigþór fékk þó hættulegt frípeð sem um tíma virtist ætla að verða að drottningu. Hann gætti þó ekki nægilega að öryggi kóngsins; hrókar svarts náðu völdum á annarri reitaröð og knúðu fram mát.

Brimir-Alexía  1-0.  Eftir rólega byrjun gleymdi Alexía sér augnablik og færði riddara sem var leppur fyrir drottningu. Eftir Bg5xd8 var liðsmunurinn of mikill og Brimir knúði fram mát í nokkrum leikjum. 

Andri er sem fyrr einn efstur með fimm vinninga af fimm mögulegum. Tobias er í öðru sæti með 3,5 vinning og þau Arnar Smári, Elsa María, Hreinn og Markús hafa 3 vinninga. Í næstsíðustu umferð sem tefld verður á fimmtudaginn eigast þessi við:

Andri og Tobias

Markús Orri og Arnar Smári 

Hreinn og Jökull Máni

Brimir og Sigþór

Alexía og Emil

Elsa og Hilmir tefla ekki í þessari umferð.