Haustmótið hafið!

Haustmót Skákfélags Akureyrar, það 74. í röðinni, hófst í gær 17. október. Keppendur eru tólf talsins. Úrslit í fyrstu umferð:
Elsa María Kristínardóttir-Hilmir Vilhjálmsson    1-0

Sigþór Árni Sigurgeirsson-Hreinn Hrafnsson        0-1

Markús Orri Óskarsson-Emil Andri Davíðsson        1-0

Tobias Matharel-Alexía Lív Hilmisdóttir           1-0

Brimir Skírnisson-Jökull Máni Kárason             0-1

Skák Andra Freys Björgvinssonar og Arnars Smára Signýjarsonar verður tefld á miðvikudag.

Hart var barist í öllum skákunum í gær og tvísýnt um úrslit í sumum þeirra. Í "Holtateigsorrustunni" náði Elsa snemma töluverðum yfirburðum og vann örugglega. Það sama má segja um skák Tobiasar og Alexíu, þar sem sú síðarnefnda lék illa af sér í upphafi miðtafls og fékk ekki rönd við reist eftir það. Í skák Sigþórs og Hreins skildu 65 ár keppendur að í aldri. Sigþór var þó ekkert hnípinn gegn Norðurlandsmeistaranum frá 1976 og blés til kóngssóknar sem gat verið hættuleg ef svartur varaði sig ekki. Reynslan kom þó Hreini að góðu gagni og með gagnatlögu á réttum tíma náði hann að knýja fram sigur. Miklar flækjur voru í skák Markúsar og Emils og var Markús manni undir um tíma, en hafði nokkur sóknarfæri, sem þó hefðu tæplega dugað gegn bestu vörn. Á hana hitti Emil ekki og því fór sem fór. Brimir náði umtalsverðum stöðuyfirburðum gegn Jökli Mána, en freistaðist af óþarfa skiptamunsvinningi og gaf andstæðingnum færi á hættulegu mótspili þar sem hann hótaði máti í einum leik. Gegn bestu vörn hefði það þó ekki dugað nema til jafnteflis, en slæmur fingurbjótur Skírnis sem fól í sér drottningartap gerði út um skákina Jökli Mána í vil. 
Næsta umferð verður tefld n.k. fimmtudag og hefst kl. 18. Röðun í hana verður birt eftir að úrslit í frestuðu skákinni liggja fyrir. 
Mótið á Chess-results.