Haustmót og önnur mót

Í næsta mánuði verður mikið um að vera á skáksviðinu og verkefni Skákfélagsins ærin. Eitt stærsta verkefni okkar er þátttaka á Íslandsmóti Skákfélaga, sem nú fer fram í Egilshöll í Reykjavík.  Þar hefur félagið skráð fjórar sveitir til leiks. Reyndar hefst taflið strax fimmtudagskvöldið 30. september með fyrstu umferð nýstofnaðrar Úrvalsdeildar.  Þar mun A-sveit félagsins reyna sig við fimm önnur öflugustu taflfélög landsins, en alls verða tefldar fimm umferðir í þessari lotu. Hin félögin eru Taflfélag Reykjavíkur, Taflfélag Garðabæjar, Skákdeild Fjölnis, Skákdeild Breiðabliks og Víkingaklúbburinn. B-sveit félagsins teflir í 1. deild, C-sveitin í 3. deild og D-sveit í 4. deild og er sú sveit m.a. skipuð nokkrum ungum iðkendum. Keppni í 1-4. deild hefst föstudaginn 1. október og verða tefldar fjórar umferðir. Þetta er fyrri hluti Íslandsmótsins en mótinu lýkur í marsbyrjun 2022.

Haustmót félagsins hefst svo sunnudaginn 10. október. Í því verða tefldar sjö umferðir eftir svissnesku kerfi. Teflt verður á sunnudögum og fimmtudögum (ein umferð þó á miðvikudegi) og lýkur mótinu þann 31. október. Þetta er meistaramót félagsins og verður teflt um meistaratitla í þremur aldursflokkum.

Íslandsmót ungmenna verður svo haldið í sal Brekkuskóla laugardaginn 30. október. Þar verður teflt um Íslandsmeistaratitla í fimm aldursflokkum (u8, u10, u12, u14 og u16). Hér gefst okkar ungu iðkendum kjörið tækifæri til að reyna sig við skákbörn úr öðrum landshlutum.

 
Mót fara fram á þessum dögum í Skákheimilinu: 
Fimmtudag 7. október kl. 20.00    Hraðskákmót

Sunnudag 10. október kl. 13.00    Haustmót 1. umf.

Miðvikudag 13. október kl. 18.00   Haustmót 2. umf.

Sunnudag 17. október kl. 13.00    Haustmót 3. umf.

Fimmtudag 21. október kl. 18.00   Haustmót 4. umf.

Sunnudag 24. október kl. 13.00    Haustmót 5. umf.

Fimmtudag 28. október kl. 18.00   Haustmót 6. umf.

Sunnudag 31. október kl. 13.00    Haustmót 7. umf.

Mótahald heldur svo áfram í nóvember, þá er m.a. stefnt að sveitakeppni ("þrenningin") og Atskákmóti Akureyrar.  Það verður nánar auglýst síðar.