Firmakeppnin hafin

Í dag fór fram fyrsta umferð Firmakeppni Skákfélags Akureyrar. 11 keppendur á öllum aldri mættu til leiks, allt frá þaulvönum meisturum til efnilegra nýliða. Hver keppandi dró nafn fyrirtækis og keppti fyrir hönd þess. Óhætt er að segja að Jón Kristinn Þorgeirsson hafi gengið hreint til verks og sópað að sér vinningum. Hann keppti fyrir Þrif og ræstivörur og hlaut 9 vinninga af 10 mögulegum. Áskell Örn Kárason sigldi fleyi sínu í örugga höfn og lenti í 2. sæti. Hann tefldi fyrir Hafnarsamlag Norðlendinga. Í 3. sæti var Sigurður Arnarson. Hann var svellkaldur í sínum skákum og sennilega ekki alveg nógu heitur til að sigra í dag. Hann keppti fyrir Frost.
Mikla athygli vakti hversu vel hinn ungi Fannar Breki Kárason stóð sig. Reynsluleysi kom í veg fyrir að hann fengi fleiri vinninga að þessu sinni en framtíð hans er björt. Hann fylgdist vel með öðrum skákum og safnaði í reynslubankann. Hann tefldi fyrir Landsbankann.

Úrslit urðu sem hér segir:

Þrif og ræstivörur (Jón Kristinn Þorgeirsson) 9 vinningar

Hafnarsamlag Norðlendinga (Áskell Örn Kárason) 7, 5 vinningar

Frost (Sigurður Arnarson) 7 vinningar.

Norðlenska (Ólafur Kristjánsson) 6,5 vinningar

Arionbanki (Símon Þórhallsson) 6,5 vinningar

Íslensk verðbréf (Sigurður Eiríksson) 5 vinningar

BSO (Smári Ólafsson) 4,5 vinningar
Íslandsbanik (Haraldur Haraldsson) 4,5 vinningar
Dekkjahöllin (Haki Jóhannesson) 2 vinningar
Landsbanki (Fannar Breki Kárason) 1 vinningur
Kaffibrennslan (Jón Magnússon) 1 vinningur

Næsta undankeppni fer fram á þriðjudaginn og við hvetjum alla skákmenn til að mæta.
Við færum þeim fyrirtækjum sem taka þátt okkar bestu þakkir.