Glæsilegt skólaskákmót - Öruggur sigur hjá Gabríel Frey

Í gær fór Sprettsmótið fram - skólaskákmót Akureyrar sem jafnframt var Skákþing Akureyrar í yngri flokkum. Átján keppendur mættu til leiks, úr fimm skólum. Af þeim luku sextán börn keppni og lokaúrslit sem hér segir:

Gabríel Freyr Björnsson	2004	Brekkuskóla	7
Fannar Breki Kárason	2005	Glerárskóla	5
Arnar Smári Signýjarson	2002	Giljaskóla	5
Sigurður Brynjar Þórisson	2004	Brekkuskóla	5
Ívar Þorleifur Barkarson	2005	Lundarskóla	4
Tumi Snær Sigurðsson	2002	Brekkuskóla	4
Aðalbjörn Leifsson	2003	Brekkuskóla	4
Arngrímur Friðrik Alfreðsson	2005	Giljaskóla	4
Skarphéðinn Ívar Einarsson	2005	Lundarskóla	4
Brynja Karitas Thoroddssen	2006	Brekkuskóla	3,5
Garðar Gísli Þórisson	2004	Brekkuskóla	3,5
Gunnar Hólm Hjálmarsson	2007	Lundarskóla	3
Alexander Máni Valdimarsson	2004	Giljaskóla	2
Lorenzo Kiljan Baruchello	2008	Brekkuskóla	1,5
Jóel Snær Davíðsson	2007	Naustaskóla	1,5
Áslaug Lóa Stefánsdóttir	2006	Brekkuskóla	1

Á myndinni má sjá sigurglaða keppendur sem eru nýbúnir að sporðrenna pizzum frá Sprettinum sem jafnan leggur til hina líkamlegu næringu á skólaskákmótinu.

Sigur Gabríels var öruggur og vann hann allar skákir sínar, en mjög hart var barist um næstu sæti og munaði þar mjög litlu á keppendum en dagsform og misjöfn lukka réði endanlegri röð þeirra umfram annað. 

Keppt var um nokkra meistaratitla á Skákþingi Akureyrar í yngri flokkum. Í barnaflokki, f. 2005 og síðar varð Fannar Breki hlutskarpastur með 5 vinninga og þeir Ívar Þorvaldur og Arngrímur Friðrik urðu í 2-3. sæti með 4 vinninga.  Í 12-13 ára flokki (fædd 2003 og 2004) varð Gabríel Freyr að sjálfsögðu hlutskarpastur og hlýtur sem sigurvegari mótsins sæmdarheitið "Skákmeistari Akureyrar í yngri flokkum". Sigurður Brynjar hreppti anað sætið í þessum flokki og Aðalbjörn það þriðja. Í elsta flokknum voru aðeins tveir keppendur og þar varð Arnar Smári sjónarmun á undan Tuma Snæ og er því meistari í flokki 14-16 ára. 

Þar sem þetta var skólaskákmót var keppt um sæti á umdæmismótinu í skólaskák. Í eldri flokki (8-10. bekk) fara þeir Arnar Smári og Tumi Snær báðir áfram og úr yngri flokknum (1-7. bekk) fá þeir Gabríel Freyr og Fannar Breki örugglega sæti á umdæmismótinu og væntanlega Sigurður Brynjar líka (hann var aðeins lægri á stigum en Fannar).

Umdæmismótið verður háð eftir páska en dagsetning er ekki ákveðin enn. Þá munu Akureyringarnir etja kappi við jafnaldra sína úr nágrannabyggðum og tefla til úrslita um sæti á Íslandsmótinu í skólaskák sem áætlað er að verði fyrstu helgina í maí.