Pistill um Íslandsmót skákfélaga

Félagi Halldór Brynjar Halldórsson, sem reyndist félaginu betri en enginn nú í seinni hlutanum hefur tekið sama pistil um mótið. Hafi hann þökk fyrir og kemur pistillinn hér á eftir. 

Síðari hluti Íslandsmóts skákfélaga fór fram sl. helgi og öttu þrjár sveitir Skákfélagsins kappi, eftir frábæra frammistöðu sveitanna í fyrri hlutanum í haust.

Svo fór að A- sveitin endaði í 4. sæti fyrstu deildar. Vissulega ákveðin vonbrigði eftir að hafa setið í 3. sætinu eftir fyrri hlutann, en þó besti árangur félagsins á áraraðir, sem ber að fagna.

Stjarna helginnar kom úr röðum Skákfélags Akureyrar, en týndi sonurinn, Björn Ívar Karlsson, sneri aftur með látum og endaði helgina með hvorki meira né minna en áfanga að alþjóðlegum meistaratitli og FIDE meistaratitil í sitt hvorum vasanum, með 6 ½ vinning af 9 mögulegum, bestan árangur A-sveitar manna. Til hamingju Björn Ívar!

Bestum árangri A-sveitar manna í síðari hlutanum náðu þeir Björn Ívar og Halldór Brynjar Halldórsson með þrjá vinninga úr fjórum skákum.

B- sveitin átti við ramman reip að draga eftir frábæra frammistöðu í fyrra sem tryggði liðinu sæti í 1. deild. Þrátt fyrir frábæra baráttu í vetur varð fallsætið niðurstaðan þetta sinnið, en það þarf vart að spyrja að því að SAaBinn kemur tvíefldur til leiks í haust.

Bestum árangri B-sveitar manna í síðari hlutanum náði Smári Ólafsson með tvo vinninga úr fjórum skákum.  

C-sveitin var í góðum málum í toppbaráttu 3. deildar eftir frábæra frammistöðu í fyrri hlutanum. Heldur seig á ógæfuhliðina í seinni hlutanum þar sem sveitin mætti sterkum sveitum, og endaði hún um miðja deild.

Bestum árangri C-sveitar manna í síðari hlutanum náði Hreinn Hrafnsson með 1 ½  vinning úr þremur skákum. 

Hér er þó ónefndur þáttur Sveinbjörns Sigurðssonar, en Sveinbjörn var ósigraður alla keppnina, bæði í fyrri og seinni hlutanum. Er hann af öðrum ótöldum, ef frá er talinn e.t.v. Björn Ívar, óskoruð stjarna keppninnar.