Reykjavíkurmótið hafið

Í dag hófst Opna Reykjavíkurmótið í skák.  Við Skákfélagsmenn eigum þarna nokkra þátttakendur og urðu úrslit þeirra flestra í samræmi við hina frægu bók. Þeir stigahærri unnu hina stigalægri, enda styrkleikamunur oft mikill í fyrstu umferðunum í opnum mótum. Hjá okkar mönnum voru þrjár undantekningar á þessu ef fréttamanni skjátlast ekki. Tvær jákvæðar og ein neikvæð.
Sigurður Eiríksson (1933) gerði jafntefli með svörtu við austurrískan alþjóðlegan meistara að nafni Oliver Lehner (2418)
Hreinn Hrafnsson (1651) gerði jafntefli við Svía að nafni Johan Sigeman (2164)
Slæmu tíðindin voru þau að Jón Kristinsson (2211) tapaði fyrir Svíanum Johanni Skúlasyni (1747). Þetta fyrirgefum við Jóni auðveldlega því sá sænski er jafn íslenskur og harðfiskur. Hann ólst upp á Akureyri og keppti lengi fyrir SA.

Eftir fyrsta dag er því staðan sú að Skákfélag Akureyrar er á pari við væntingar.