Íslandsmótið í atskák - 8 keppendur frá SA.

Í gær fór fram Atskákmót Icelandair 2015 - Íslandsmótið í atskák. Það er félagi okkar, Óskar Long, sem bar hitann og þungann af þessu móti og á hann heiður skilinn fyrir það.

Stórmeistarinn Helgi Ólafsson varð Íslandsmeistari. Hann fór taplaus í gegnum mótið og hlaut að lokum 7,5 vinninga í 9 skákum. Í öðru sæti varð stórmeistarinn Hjörvar Steinn Grétarsson með jafn marga vinninga.

Skákfélagið óskar Helga til hamingju með titilinn og Hjörvari með annað sætið.

Alls tóku 88 skákmenn þátt í mótinu og þar af voru 8 skákmenn frá Skákfélagi Akureyrar. Má segja að þeir hafi allir staðið undir væntingum og vel það. Sú niðurstaða er fengin með því að miða endanlegt sæti við styrkleikaröðina fyrir mót.

Efstur okkar manna varð Áskell Örn Kárason, formaður vor. Hann hlaut 1,5 vinningum minna en efstu menn eða 6 vinninga samtals. Það dugði honum í 12. sæti en hann var í 17. sæti styrkleikaraðarinnar.

Halldór Brynjar Halldórsson hlaut jafnmarga vinninga en endaði í 15. sæti (16. sæti styrkleikaraðarinnar). Í 9 umferðum tefldi Halldór þrisvar við félaga sína í SA í mótinu. Hann vann tvo en tapaði fyrir lærlingi sínum frá Heimsmeistaramóti ungmenna, Símoni Þórhallssyni.

Sæti neðar, með 5,5 vinninga líkt og tveir aðrir SA-menn, varð Björn Ívar Karlsson. Það má segja að hann og Halldór hafi skipt um sæti því Björn var í 15. sæti styrkleikaröðuninnar. Björn Ívar fékk erfiða andstæðinga. Hann mætti þremur stórmeisturum og þremur alþjóðlegum meisturum og var lengst af í toppbaráttunni en tap í síðustu umferð sendi hann niður í sæti sem er á pari við styrkleikaröðunina.

Næstur okkar manna varð Stefán Bergsson. Hann endaði með jafnmarga vinninga og Björn Ívar og lenti í 21. sæti sem er það sama og styrkleikaröðin sagði til um.

Þriðji norðanmaðurinn með 5.5 vinninga varð Þór Valtýsson. Hann endaði í 27. sæti (28. sæti styrkleikaraðarinnar). Mesta afrek Þórs í mótinu verður að teljast sigur hans á Fidemeistaranum Sigurði Daða (2280) í 4. umferð.

6. Skákfélagsmaðurinn í mótinu varð ungstirnið Símon Þórhallsson. Hann hlaut 5 vinninga og endaði í 29. sæti. Samkv. styrkleikalistanum fyrir mót var hann í sæti 43. Samt kemur árangur hans ekki á óvart því þeir sem til þekkja vita að hann á mikið inni. Í fyrra náði Símon þeim óvænta árangri að lenda í 4. sæti mótsins.

Næstur okkar manna varð Haraldur Haraldsson. Hann hlaut 4,5 vinninga og endaði í 47. sæti. Fyrir mót var honum raðað í sæti 31 og varð hann aðeins hálfum vinningi frá því sæti.

8. félagsmaður okkar varð Óskar Long Einarsson. Hann hlaut 4 vinninga og endaði í 53. sæti en var í því 66. á styrkleikalistanum. Óskar lagði meðal annars Pál Agnar Þórarinsson sem er með 2181 skákstig eða rúmum 500 skákstigum meira en Óskar.

Heildarúrslitin má sjá hér: http://chess-results.com/tnr201665.aspx?lan=1&art=1&rd=9&wi=821