Íslandsmót skákfélaga um helgina!

Nú er en og aftur komið að þeirri stórhátíð skákmanna sem er Íslandsmót skákfélaga (öðru nafni deildó). Eins og oft áður er teflt í Rimaskóla í Reykjavík. Í þetta sinn eigum við tvær sveitir í fyrstu deild og þær hefja báðar keppni í kvöld kl. 19.30. Því eru nokkrir keppendur að leggja af stað í hádeginu til Reykjavíkur; aðrir eru þegar komnir suður. Í fyrstu umferð teflir a-sveitin við a-sveit Hugins, sem líklega er með sterkasta liðið í keppninni nú; en b-sveitin teflir við b-sveit Taflfélags Reykjavíkur. Innbyrðis viðureign SA-sveitana verður svo í annarri umferð.

Félagið sendir svo c-sveit til keppni í 3. deild og þar hefst taflmennskan kl. 20 annað kvöld, föstudag. Farið verður af stað frá Skákheimilinu kl. 12 á morgun.

Því miður náðist ekki saman lið til að tefla í 4. deild í þetta sinn. D-sveitin kemur vonandi sterk inn strax á næsta ári.