Færeyingar erfiðir!

Fyrri umferð landskeppninar við Færeyinga var tefld á Laugum í Reykjadal í gær. Er skemmst frá því að segja að Íslendingunum gekk afleitlega og máttu bíta í það súra epli að tapa með 3,5 vinningum gegn 6,5.

Úrslitin má sjá á heimasíðu Hugins: http://skakhuginn.is/landskeppnin-faereyjingar-unnu-stort-i-fyrri-umferdinni/

Eins og ávallt þegar viðureignir tapast var í þetta sinn ýmislegt sem mátti betur fara og okkar menn ekki beinlínis farsælir. Á tveimur efstu borðunum voru stöðurnar góðar, en bæði Einar Hjalti og Áskell léku illa af sér með betra tafl og aftur í jöfnu tafli og þá snarlega niður í tap.   Á þriðja borði sást Birni Ívari yfir líklega vinningsleið í endatafli en skipti í þess stað upp í jafntefli. Jón Kristinn stóð lengi mun betur á fimmta borði en mátti sætta sig við skiptan hlut. Sömuleiðis virtist Símon lengi vel standa mun betur, en einnig þar var staðan jafntefli. Sama niðurstaða hjá Jakobi Sævari á 9. borði. Uppskeran var sjö jafntefli og þrjú töp.

Í dag kl. 14 fer síðari umferðin fram í Skákheimilinu á Akureyri.  Fjórar breytingar verða á íslenska hópnum: Halldór Brynjar Halldórsson kemur inn á 2. borð í stað Áskels, Haraldur Haraldsson leysir Mikael Jóhann af á sjötta borði, og Huginsliðarnir Tómas Veigar Sigurðsson (8. borð) og Elsa María Kristínardóttir (10. borð) koma inn í stað Smára Sigurðssonar og Sigurðar Daníelssonar.

Þótt útlitið sé dökkt er enn hægt að vinna sigur, en líklega eru a.m.k. átta ár síðan við Íslendingar unum síðast sigur í þessari keppni! 

Þeir sem eiga ónagaðar skjaldarrendur eru vinsamlegast beðnir um að bíta nú sem fastast. Aðrir girði sig í brók og láti eigi deigan síga.