Landskeppni við Færeyinga

Nú á föstudaginn eru væntanlegir til Akureyrar góðir gestir. Tíu færeyskir skákmenn koma þá til að etja kappi við félaga úr Skákfélagi Akureyrar og Skákfélaginu Hugin í landskeppni Íslands og Færeyja sem nú er háð í 19. sinn - en keppnin var fyrst háð árið 1978.

Af hálfu okkar Skákfélagsmanna munu Áskell Örn Kárason, Björn Ívar Karlsson, Halldór Brynjar Halldórsson, Jón Kristinn Þorgeirsson, Mikael Jóhann Karlsson og Símon Þórhallsson taka þátt í keppninni að þessu sinni. Teflt verður á Laugum í Þingeyjarsveit kl. 14 á laugardag og á Akureyri á sama tíma á sunnudag. Keppnin fer fram á 10 borðum.

Áhugasamir eru hvattir til að mæta og fylgjast með spennandi keppni.

Nú á FÖSTUDAG verður skemmtikvöld í Skákheimilinu þar sem gestum okkar verður boðið upp á léttar veitingar og telfdar hraðskákir. Það er hefð fyrir slíkri móttöku í tengslum við landskeppnina.

Allir fulltíða félagsmenn eru velkomnir á þessa samkomu og þeir hvattir til að mæta á föstudagskvöldið.