Lokaspretturinn

Þriðjudagur, 17. mars 2015

Í dag lauk næstsíðustu umferð Opna Reykjarvíkurmótsins. Lokaumferðin fer fram á morgun. Rétt er því að fara yfir gengi okkar manna.

Efstur okkar manna er formaðurinn, Áskell Örn Kárason (2274). Hann hefur 5,5 vinninga og er í 66. sæti en var raðað í 92 sæti styrkleikalistans fyrir mótið. Árangur hans í mótinu hingað til samsvarar 2338 skákstigum og hann hefur bætt við sig 15 stigum. Besti árangur hans í mótinu hingað til var að vinna sænska alþjóðlega meistarann Björn Olander (2380). Á morgun teflir Áskell við 5. titilhafann í mótinu. Sá heitir Stef Soors(2408) og er alþjóðlegur meistari frá Belgíu. http://www.chess-results.com/tnr143563.aspx?lan=1&art=9&fed=ISL&flag=30&wi=821&snr=92

Jón Kristinn Þorgeirsson (2177) er með 5 vinninga eins og fleiri félagsmenn. Jokkó var skipað í sæti 107 en er í 91. sæti fyrir lokaumferðina. Hann hefur mætt sterkum andstæðingum og er með árangur sem metinn er á 2322 skákstig. Hann hefur bætt við sig rúmlega 64 skákstigum. Hann hefur m.a. unnið einn alþjóðlegan meistara og gert jafntefli við stórmeistara. Í lokaumferðinni fær Jón fremur stigalágan Pólverja sem hefur er þó með jafn marga vinninga og Jón. http://www.chess-results.com/tnr143563.aspx?lan=1&art=9&fed=ISL&flag=30&wi=821&snr=107

Næstan ber að nefna Jón Kristinsson (2251) sem hefur einnig 5 vinninga. Það vakti athygli í skákheiminum þegar Jón kom aftur að skákborðinu eftir nokkurt hlé. Þegar haft er í huga að hann er fæddur árið 1942 og hefur ekki teflt mikið hin síðari ár má búast við að hann tapi nokkrum stigum. Það hefur hann gert. Árangur hans er metinn á 2156 stig og hann hefur tapað 20 stigum. Hann var í 94. sæti styrkleikalistans en er nú í sæti 107 sem er einmitt sætið sem Jóni yngra var skipað í fyrir mótið. Hann hefur ekki enn unnið andstæðing með yfir 2000 stig í mótinu en fær lokatækifærið á morgum gegn Kanadamanni með 2038 stig. http://www.chess-results.com/tnr143563.aspx?lan=1&art=9&fed=ISL&flag=30&wi=821&snr=94

Fyrrum formaður félagsins, Gylfi Þórhallsson (2084) hefur átt misjöfnu gengi að fagna og teflt betur eftir því sem liðið hefur á mótið. Besti árangurinn er að hafa lagt norska FIDE-meistarann Lars Oskar Hauge (2380). Gylfi er með 5 vinninga og í 105. sæti en var skipað í 131. sæti styrkleikalistans. Þrátt fyrir að vera 26 sætum ofar en styrkleikalistinn gaf til kynna er árangur hans metinn á 2071 skákstig og hann er með 1,4 skákstig í mínus. Það má því segja að heildarárangur hans sé nokkuð nálægt því að vera á pari. Gylfi hefur teflt við 3 FM-meistara hingað til og mætir þeim fjórða, Vestfirðingnum Guðmundi Gíslasyni(2321) á morgun. Á góðum degi getur Gylfi unnið hvern sem er og eflaust verður hart barist á morgun. http://www.chess-results.com/tnr143563.aspx?lan=1&art=9&fed=ISL&flag=30&wi=821&snr=131

Harladur Haraldsson (1948) er einnig í hópi skákmanna með 5 vinninga. Fyrir mótið var hann í 167. sæti styrkleikalistans en er nú í sæti 111. Árangur hans er metinn upp á 2056 skákstig og hefur hann fengið 25 stig fyrir árangurinn. Besti árangur hans í mótinu er að hafa unnið kanadískan FIDE-meistara. Þann árangur gæti hann bætt á morgun ef hann leggur Einar Hjalta (2390) á morgun. http://www.chess-results.com/tnr143563.aspx?lan=1&art=9&fed=ISL&flag=30&wi=821&snr=167

Mikael Jóhann Karlsson (2138) er með 4,5 vinninga. Hann var í sæti 117 á styrkleikalistanum en er núna í sæti 127. Besti árangur hans í mótinu er sigur í 3. umferð á alþjóðlegum meistara með 2394 stig. Árangur hans jafngildir 2198 stigum og hefur hann grætt 12 stig á mótinu. Á morgun mætir hann Pólverja með 1950 stig. http://www.chess-results.com/tnr143563.aspx?lan=1&art=9&fed=ISL&flag=30&wi=821&snr=117

Stefán Bergsson (2063) er með jafn marga vinninga og Mikki en þremur sætum neðar. Hann var í sæti 138 á styrkleikalistanum og er því nokkuð nálægt því sæti sem búast mátti við. Árangur hans nú er metinn á 2052 stig og er hann með 5 stig í mínus. http://www.chess-results.com/tnr143563.aspx?lan=1&art=9&fed=ISL&flag=30&wi=821&snr=138

Þór Valtýsson (1974) er nokkuð nálægt því að vera með þann árangur sem styrkleikalisti mótsins sagði fyrir um. Hann var settur í 158. sæti en er nú í sæti 151. Þór byrjaði fremur illa á mótinu en hefur rétt hlut sinn í seinni hluta mótsins. Árangur hans er metinn á 1928 stig og hefur hann tapað 9 stigum á mótinu. http://www.chess-results.com/tnr143563.aspx?lan=1&art=9&fed=ISL&flag=30&wi=821&snr=158

Rétt neðan við Þór er Símon Þórhallson (2009). Hann er nú í sæti 156 en var í sæti 152 á styrkleikalistanum. Í 6. umferð lagði Símon sinn fyrsta titilhafa á ferlinum í kappskák og er það hans besti árangur í mótinu. Síðan hefur hann mætt þremur titilhöfum í röð og tapað fyrir þeim öllum. Þrátt fyrir það er árangur hans metinn á 2169 stig og hefur hann grætt um 60 skákstig. Á morgun mætir hann Dana með rúmlega 1800 skákstig og er vitanlega sigurstranglegur. http://www.chess-results.com/tnr143563.aspx?lan=1&art=9&fed=ISL&flag=30&wi=821&snr=152

Karl Egill Steingrímsson (1720) er kominn með 4 vinninga eftir sigur á Þjóðverja með rúmlega 1900 skákstig í dag. Það er hans besti árangur í mótinu hingað til. Hann var í 216. sæti styrkleikalistans en er nú í 195. sæti. Árangurinn er talinn jafngilda 1662 stigum og hefur hann tapað 9 stigum. Á morgun mætir hann sterkum, dönskum skákmanni. http://www.chess-results.com/tnr143563.aspx?lan=1&art=9&fed=ISL&flag=30&wi=821&snr=216

Óskar Long Einarsson (1574) tapaði þremur fyrstu skákum sínum í mótinu en síðan hefur flest gengið honum í hag. Árangur hans er metinn á 1748 skákstig og hefur hann grætt tæp 30 stig með árangrinum. Hann er nú með 4 vinninga. Hann var settur í 236. sæti styrkleikalistans og er nú í sæti 180. Miðað við árangurinn á mótinu hingað til á hann góðan séns gegn andstæðingi sínum á morgun þótt Óskar sé stigalægri. http://www.chess-results.com/tnr143563.aspx?lan=1&art=9&fed=ISL&flag=30&wi=821&snr=236

Í 12. sæti okkar manna er Ulker Gasanova (1645). Árangur hennar hefur ekki verið eins og búist var við og jafngildir 1554 stigum. Hún hefur tapað 46 stigum. Besti árangur hennar er jafntefli við Svía með tæp 1900 stig í 5. umferð. Það sýnir vel hvað hún getur á góðum degi. En því miður hefur Ulker tapað öllum skákum sínum síðan og er aðeins með 2 vinning. Hún var i 228. sæti styrkleikalistans en er nú í sæti 259. Hún mun vonandi rétta hlut sinn í lokaumferðinni. http://www.chess-results.com/tnr143563.aspx?lan=1&art=9&fed=ISL&flag=30&wi=821&snr=228

Veljið skák (102 alls):

Flokkur: Spil og leikir | Breytt 18.3.2015 kl. 12:46 | Facebook

Bæta við athugasemd [Innskráning]

Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.

Um félagið

Skákfélag Akureyrar

Skákfélag Akureyrar var stofnað 10. febrúar árið 1919 og er meðal elstu félaga á Akureyri.

Félagið aðstöðu í Skákheimilinu í Íþróttahöllinni - gengið inn að vestan (Þórunnarstrætismegin).

Áskell Örn Kárason er formaður félagsins.

Netfang formanns er askell@simnet.is og þangað má koma upplýsingum og ábendingum um efni á heimasíðuna..

Skákfélag Akureyrar

Efni

Skákfélag Akureyrar