Símon efstur norðanmanna

Í dag fór fram 6. umferð Opna Reykjarvíkurmótsins. Enginn okkar manna var í beinni útsendingu. Úrslitin pkkar manna og konu urðu sem hér segir:

Gylfi Þórhallsson (2084) stýrði hvítu mönnunum gegn enska FIDE-meistaranum Daníel L. Bibsy (2321) og tapaði. Hann hefur 3 vinninga en hefur tapað 16,4 skákstigum.

Stefán Bergsson (2063) hafði hvítt gegn Þjóðverjanum Philipp Hitzler (2315) og gerðu þeir jafntefli. Stefán er nú með 3,5 vinninga og hefur bætt við sig 14 skákstigum

Símon Þórhallsson (2063) var með hvítt gegn FIDE-meistara að nafni Stig Tjomsland (2300) frá Noregi. Símon gerði sér lítið fyrir og vann. Fréttaritari man ekki eftir að Símon hafi áður sigrað titilhafa í kappskák og er sérstök ástæða til að óska honum til hamingju með það. Símon hefur flesta vinninga Skákfélagsmanna eða 4 og hefur grætt 77,2 stig fyrir árangurinn.

Áskell Örn Kárason (2274) stýrði svörtu mönnunum og skellti Spánverja að nafni Lopes Jaime Martines (2044). Áskell er núna með 3,5 vinninga og 1,4 skákstig í sarpinum.

Jón Kristinsson (2251) stjórnaði Hvíta hernum gegn Englendingi að nafni Matthew Lunn (2034). Niðurstaðan varð jafntefli. Jón hefur 3 vinninga og hefur tapað 12,4 stigum.

Haraldur Haraldsson (1984) handlék hvítu mennina gegn norska FIDE-meistaranum Richard Bjerke (2180) og gerðu þeir jafntefli. Halli hefur þrjá vinninga og hefur tapað einu skákstigi.

Jón Kristinn Þorgeirsson (2177) stýrði svörtu mönnunum gegn hinum sænska Peter Korning (1944). Jokkó vann og hefur 3,5 vinninga. Árangur hans í mótinu samsvarar 2325 skákstigum og hefur hann hækkað um 47,2 skákstig.

Mikael Jóhann Karlsson (2138) hafði hvítt. Hann mætti Þjóðverjanum Gerd Densing (1903) og var snöggur að ljúka sinni skák með sigri eftir að sá þýski lék illa af sér. Hann er nú með 3,5 vinninga og 16,4 skákstig í gróða.

Ulker Gasanova (1645) heldur áfram að mæta Norðurlandabúum. Núna hafði hún svart gegn Norðmanni að nafni Jon Olav Fivelstad (1929) sem bar sigurorð af Ulker. Hún hefur 2 vinninga og hefur taðað tæpu skákstigi.

Þór Már Valtýsson (1974) hafði svart gegn landa sínum Heimi Páli Ragnarssyni (1497) og vann. Þór hefur 2,5 vinninga og hefur tapað 14 skákstigum.

Karl Egill Steingrímsson (1720) gerði jafntefli við hinn vel ættaða Pál Þórsson (1634) með hvítu mönnunum. Kalli hefur 2 vinninga og hefur tapað 21,4 stigum.

Óskar Long Einarsson (1574) var með svart gegn Joshua Davíðssyni (1216) og sigraði. Hann hefur tvo vinninga en hefur tapað tveimur skákstigum.

Á morgun munum við fylgjast með beinni útsendingu í Skákheimilinu.