Jokkó og Mikki lögðu alþjóðlega meistara!

Í dag fóru fram 2 umferðir í Opna Reykjarvíkurmótinu.

Í fyrri umferðinni bar hæst sigur Jóns Kristins á alþjóðlegum meistara. Aðrar skákir í þeirri umferð fóru eftir bókinni hjá okkar mönnum. Þeir stigahærri unnu þá stigalægri.

Áskell (2274) tapaði með hvítu gegn alþjóðlegum meistara frá Póllandi Jacek Stopa (2544)

Jón Kristinsson (2251) laut í gras með hvítu fyrir kínverska stórmeistaranum Rui Gao (2533)

Jón Kristinn (2177) hafði svart gegn kanadíska alþjóðlega meistaranum Razvab Preoyu (2447) og sigraði. Þeir félagarnir eru jafnaldrar.

Gylfi (2084)stýrði svörtu mönnunum gegn stórmeistara kvenna frá Kazakhstan. Sú heitir Zhansaya Abdumalik (2379) og hefur unnið allar sínar skákir. Það vekur mikla athygli enda er hún ekki nema 14 ára!

Ulker (1645) hafði svart og beið ósigur fyrir Svía að nafni Adam Brzezinski (2150. Má vart á milli sjá hvort þeirra hefur norrænna nafn.

Stebbi Bergs (2063) lagði Agnar T Möller (1806) með svörtu.

Kalli Steingríms (1720) mátti sætta sig við tap með hvítu gegn hinum spænska Aguilar Enrique Cabello (2015).

Símon (2009) hafði svart gegn Norðmanninum Hans K. Gaarder og hafði betur.

Þór (1974) hafði einnig svart gegn Norðmanni og grillaði hann. Sá heitir Karl-Johan Rist (1677)

 

Haraldur (1948) hafði hvítt gegn norskum skákmanni að nafni Pal Nordquella (1599) og vann.

Óskar (1574) lét í minni pokann með svörtu gegn Svíanum Peter Korning (1944)

Mikki sat yfir.

Í seinni umferð dagsins fóru flestar skákir okkar manna eins og búast hefði mátt við. Þó voru á því þrjár undantekningar. Þar bar hæst að Mikael lagði alþjóðlegan meistara og stórmeistara kvenna frá Rúmeníu. Sú heitr Cristina-Adela Foisor (2394).

Jokkó laut í gras fyrir svissneskum, alþjóðlegum meistara Nico Georgiadis (2468)

Norskur Fidemeistari að nafni Stig Tomsland (2300) lagði Halla en Jón Kristinsson hefndi fyrir það með því að leggja Norðmann með svörtu. Sá heitir Bjarne Undheim (1926)

Gylfi lét í minni pokann fyrir sér stigalægri andstæðingi. Sá er danskur að ætt og heitir Flemming Borg (1828)

Stefán lagði Ítala að nafni John Nicholson (1808)

Þór mátti þola tap gegn Þjóðverjanum Roland Loos (2337) sem tefldi af mikilli festu.

Símon mátti aftur þola tap með hvítu gegn stigaháum, kanadískum titilhafa. Nú var það alþjóðlegur meistari að nafni Razvan Preotu (2447). Það er sami meistarinn og Jokkó lagði um morguninn.

 

Ulker vann sína fyrstu skák. Fórnarlambið var Joshua Davíðsson (1216)

Óskar mátti sætta sig við þriðja tapið. Nú gegn Hollendingi að nafni Yuri Eijk (2062). Hann hefur verið óheppinn með andstæðinga og þeir hafa allir verið töluvert stigahærri en hann.

Karl Egill hafði svart gegn Pólverja að nafni Adrian Starosciak (1304) Sá er töluvert stigalægri en Karl sem er ekki enn kominn á blað.

Áskell Örn tók sér yfirsetu í seinni umferðinni

 

Efstur okkar manna er Mikael Jóhann með 2,5 vinninga eftir þrjár umferðir. Jón Kristinn, Jón Kristinsson og Stefán eru með 2 vinninga.