Haki lagði Jón. Jón sigraði í mótinu.

Hið árlega Nýársmót Skákfélagsins fór fram samkvæmt venju í dag. Ekki voru salarkynni félagsins þjökuð af fjölmenni en mannavalið var einstaklega vel heppnað. Samtals mættu sjö þátttakendur og tefld var tvöföld umferð með fimm mínútna umhugsunartíma á hvern keppenda í hverri skák. Það bar helst til tíðinda að Jón Kristinn tapaði sinnu fyrstu skák ársins hjá félaginu. Það var enginn annar en sjálfur Haki Jóhannesson sem lagði hann af velli. Eftir það leit Jón ekki til baka og vann 11 skákir í röð. Röð manna varð sem hér segir nánast í aldursröð.

Jón Kristinn sigraði með fádæma öryggi og hlaut 11 vinninga af 12 mögulegum.

Í öðru til þriðja sæti urðu jafnaldrarnir Sigurður Arnarson og Gauti Páll með 7 vinninga.

Næstu keppendur urðu harla jafnir og var aðeins hálfur vinningur á milli þeirra.

Í 4. sæti varð Haraldur með 5 vinninga Hann hlaut aðeins 1 vinning í fyrri umferð en girti sit heldur betur í brók í þeirri seinni.

Sigurður Eiríksson fékk hálfum vinningi minna og endaði sæti neðar.

Haki Jokkóbani varð hálfum vinningi á eftir Sigurði með samtals 4 vinninga.

Karl aldursforseti varð 7. með hálfum vinningi minna.