Frá aðalfundi - Gylfi kjörinn heiðursfélagi

Stuttlega hefur verið greint frá aðalfundi félagsins hér á síðunni, en ýmislegt er eftir. Þegar hefðbundnum aðalfundarstörfum var lokið, kvaddi formaður félagsins sér hljóðs og bar undir fundinn þá tillögu að Gylfi Þórhallsson,  fyrrum formaður félagsins og helsti afreksmaður þess um árabil, yrði gerður að heiðursfélaga. Þegar Gylfi varð sextugur þann 23. maí sl. ákvað stjórn félagsins að gera þetta að tillögu sinni, en hin formlega ákvörðun um heiðusfélaga er tekin á aðalfundi. Þetta er nú orðin raunin og er Gylfi boðinn velkomin í hóp heiðursfélaga okkar ágæta félags. Eins og við mátti búast var kjör hans samþykkt af öllum fundarmönum með lófaklappi.

Í upphafi fundarins var annars félaga minnst - þá höfðu fundarmenn mínútu þögn til að minnast Maríu Stefánsdóttur, ritara fráfarandi stjórnar, sem lést eftir baráttu við illvígan sjúkdóm í júní sl.  María áberandi í starfi félagsins um árabil og fyrirmynd annarra foreldra í því hvernig hún studdi við bakið á skákiðkun sonar síns, Jóns Kristins, sem fyrr á árinu varð Skákmeistari Akureyrar í fyrsta sinn, aðeins 14 ára gamall.

Önnur störf aðalfundar fóru fram með venjubundnum hætti. Rekstur félagsins var þó erfiðari en áður, og var í járnum á síðasta fjárhagsári. Munaði þar mestu um aukin útgjöld vegna Íslandsmóts skákfélaga.