Fjörið að byrja!

Loksins, loksins eru taflmennirnir að vakna af sumardvala og nýtt skáktímabil að hefjast hér í höfuðstað Norðurlands.

 

Að vanda byrjum við á STARTMÓTINU, fimmtudaginn 4. september. Taflið hefst kl. 18.00.

 

 

Strax tveimur dögum síðar hefst AFMÆLISMÓT GYLFA ÞÓRHALLSSONAR. Fáir hafa leikið stærra hlutverk í starfi Skákfélagsins undanfarna áratugi en Gylfi. Á skákborðinu er hann margfaldur meistari, auk þess sem hann var formaður félagsins um langt árabil og aðal driffjöðrin í starfi þess.  Gylfi varð sextugur í maí sl. og nú viljum við halda veglegt mót honum til heiðurs. Mótið hefst kl. 13.00 laugardaginn 6. september og verður fram haldið daginn eftir. Tefldar verða 10 mínútna skákir, 13 umferðir. Eru allir skákáhugamenn beðnir um að setja þetta í minnisbókina, en mótið verður betur auglýst í næstu viku.

 

AÐALFUNDUR félagsins verður haldinn 14. september kl. 13.00.

HAUSTMÓT félagsins hefst fimmtudaginn 25. september og verður teflt fjóra daga í röð, 1-5. umferð. Tvær síðustu umferðirnar fara svo fram dagana 11-12. október, helgina eftir Íslandsmót skákfélaga.

ÆFINGAR fyrir börn og unglinga eru einnig að hefjast. Skráning og fyrsta æfing í ALMENNUM FLOKKI verður mánudaginn 8. september kl. 16.30. Framhaldsflokkurinn hefst svo 10. september kl. 17.00.