Úrslit í skógarskákmótinu

Í dag fór fram Skógarskákmót Skákfélags Akureyrar og Skógræktarfélags Eyfirðinga. Mótið var haldið í tengslum við Skógardaginn sem haldinn var hátíðlegur í Kjarnaskógi. 10 skákmenn mættu í súldinni og háðu harða og drengilega baráttu.

Efstur aðkomumanna varð Arnaldur Loftsson með 5,5 vinninga. Hlaut hann að launum ókeypis ferð í stóru rennibrautina í Kjarnaskógi.

Flesta vinninga í mótinu hlutu Jón Kristinn Þorgeirsson og afmælisbarnið Áskell Örn Kárason. Þeir unnu allar sínar skákir nema innbyrðis viðureignina sem lauk með jafntefli. Hlutu þeir að launum ókeypis ferð innanbæjar með strætó á Akureyri. Það kom mjög á óvart að þessi góði árangur dugði þeim ekki til sigurs í mótinu. Lýstur sigurvegari varð skógarvörðurinn á Vöglum, sjálfur Rúnar Ísleifsson. Að vísu fékk hann eitthvað færri vinninga en sumir aðrir en hann var sá eini af keppendunum sem hefur lífsviðurværi sitt af skógrækt. Því var hann útnefndur sigurvegari. Að launum hlaut hann ferðavinning að eigin vali og eigin kostnað. Verðlaunin nýtti hann samdægurs til að koma sér heim í Vaglaskóg.

Hér með er öllum keppendum þökkuð þátttakan.