Jokkógammbítar

Á morgun, sunnudaginn 16. mars verður skylduleikjamót hjá Skákfélagi Akureyrar. Tefldar verða stöður sem upp koma eftir byrjanir sem kalla má gammbíta. Þannig verður skákmönnum boðið að stíga út fyrir þægindarammann í byrjanavali. Það er ungstirnið  Jón Kristinn Þorgeirsson sem velur stöðurnar og sér til þess að allt fari vel fram á milli þess sem hann mátar andstæðinga sína og leikur sér í Candy floss í símanum sínum. Tímamörkin verða 5:3 sem merkir að hver fær fimm mínútur á skák en að auki þrjár sek. á hvern leik. Það er því ekki nokkur leið að „berja menn niður“ í steindauðum jafnteflisstöðum. Herlegheitin hefjast kl. 13.00 og sigurvegarinn verður sá brögðóttasti í hópnum.