SÞA - Landsbankamótið:

Sá yngsti í forystunni!

Skákþingið er sannkallað kynslóðamót. Það eru afar mættir til leiks innan um börn og miðaldra skörunga. Ömmurnar eru heldur ekki langt undan. Í fimmtu umferð, sem tefld var í gær áttust m.a. við tveir yngstu keppendurnir (í innbyrðis skák) og einnig tveir elstu. Reyndar var skák unglinganna telfd fyrirfram vegna utanferðar annars þeirra, en hin fór svo sannarlega fram á réttum tíma. Þar sýndi aldursforseti mótsins, Hjörleifur Halldórsson, klærnar í mögnuðum byrjanafræðilegum undirbúningi og vann epískan sigur á varaforsetanum (aldurs- altso) Sigurði Eiríkssyni.  Eftir fjóra sigra í röð mátti Eiríksson sætta sig við tap í 25 leikjum gegn hinum vélráða kollega sínum. Þar með náði yngissveinnin Jokko forystu með sigri á Símoni bekkjarbróður.  Svo mátti meistari Haraldur láta af hendi hálfan vinning í sinni skák - var lengi með betra en fann aldrei náðarhöggið.  Jakob og Rúnar gerðu einnig jafntefli í skák þar sem Siglfirðingurinn fórnaði manni fyrir ónógar bætur. Skógarvörður okkar stefndi á sigur um hríð, en einn ónákvæmur leikur undir lokin gerði jafnteflið að eyfirskri staðreynd. Þeir Logi Rúnar og Tómas Veigar hafa báðir átt undir högg að sækja á mótinu til þessa og skák þeirra bar e.t.v. nokkur merki þess.  Logi hafði lengi prýðisgóða stöðu en lenti svo í erfiðu endatafli þar sem Tómas átti öll ráð í hendi sér. Ónákvæmur leikur hans færði Loganum hinsvegar nýja von, sem slökknaði skyndlega við slæman afleik í 68. leik. Líklega lengsta skák mótsins til þessa.

Allir eru nú misjafnlega sárir eftir þennan bardaga, en nánar tiltekið eru úrslitin sem hér segir:

Haraldur-Andri        1/2

Sigurður-Hjörleifur  0-1

JónKr-Símon           1-0

Jakob-Rúnar           1/2

Tómas-Logi            1-0

Og staða efstu manna eftir fimm umferðir (nánar má sjá allt á Chess-results): 

Jón Kristinn Þorgeirsson         4.5

Sigurður Eiríksson og

Haraldur Haraldsson              4

Hjörleifur Halldórsson            3

og aðrir minna. Rétt er að benda á að þeir þrír efstu eiga alveg eftir að tefla innbyrðis.