Góður dagur Skákfélagsmanna

Eins og flestum skákáhugamönnum er vafalítið kunnugt stendur nú yfir opna Íslandsmótið í skák.  Við Skákfélagsmenn eigum þar vaska sveit skákmanna sem er sex manna góð blanda af reynsluboltum og efnispiltum. Í dag fór fram 6. umferð og töpuðu okkar menn ekki skák þótt sumir þeirra séu svo miklir friðsemdarmenn að þeir hafi sæst á jafntefli.

Stefán Norðurlandsmeistari Bergsson er stigahæstur okkar manna með 2157 skákstig sem setur hann í 15. sæti styrkleikalistans. Hann er með 4 vinninga og hefur tapað nokkrum skákstigum. Vandræði Stefáns stafa af því hversu erfitt hann á með að kljást við konur  við skákborðið. Þetta er sérstaklega merkilegt í ljósi góðs árangurs hans í baráttu við konur á öðrum vígstöðum.

Næst stigahæstur okkar manna er Gylfi Þórhallsson sem er í 16. sæti styrkleikalistans með 2151 skákstig. Gylfi hefur fjóra vinninga eins og Stefán en hefur teflt við stigahærri andstæðinga og er nánast á pari við stigin sín. Gylfi tefldi hörkuskák við stórmeistarann Stefán Kristjánsson í 5. umferð og tapaði þar sinni fyrstu skák á mótinu. Strax eftir skákina benti Halldór B. Halldórsson á glæsilega vinningsleið fyrir Gylfa sem hófst með hróksfórn í 34. leik. Því miður missti Gylfi af því og því fór sem fór.

Í 20. sæti styrkleikalistans er Þór Valtýsson með 2046 skákstig. Hann er taplaus á mótinu og hefur fjóra vinninga eins og Stefán og Gylfi. Þór hefur m.a. gert jafntefli við WGM Lenka Ptacnikova (2255) og FM Þorstein Þorsteinsson (2266) Þór hefur bætt við sig sjö stigum fyrir þátttökuna.

Sæti neðar á listanum er Mikael Jóhann Karlsson með 2022 skákstig. Hann er með 3,5 vinninga og hefur aðeins tapað fyrir titilhöfum. Í 4. umferð tefldi hann við stórmeistarann Héðinn Steingrímsson og upp kom þrátefli eftir 13 leiki þar sem stórmeistarinn vildi halda í peð sem Mikki færði honum. Okkar maður krafðist ekki jafnteflis enda fékk Héðinn verri stöðu eftir að hann kom sér út úr þráteflinu. Mikael bætti stöðu sína jafnt og þétt en svo fór að lokum að stórmeistarinn snéri á hann og vann. Grátlegt fyrir okkar mann sem hefur tapað rúmlega 3 skákstigum á mótinu.

Í 47. sæti styrkleikalistans er Óskar Long með 1605 stig en árangur upp á rúmlega 1800 stig. Óskari hefur farið mikið fram að undanförnu og hefur bætt við sig 15 stigum það sem af er. Hann er með 3 vinninga og hefur aðeins tapað fyrir skákmönnum með yfir 2000 stig.

Í 53. sæti er sjötti keppandi SA. Það er enginn annar en hinn ungi Símon Þórhallsson. Hann hefur verið óheppinn í sínum skákum og misst niður vinninga í a.m.k. 2 skákum. Hann er samt með 2,5 vinninga og hefur bætt lítillega við sig skákstigum.    

Öll úrslit má sjá á http://chess-results.com/tnr102708.aspx?lan=1

Við óskum okkar mönnum góðs gengis í seinni hlutanum.