Jón Kristinn og Símon með silfur og brons

Okkar menn gerðu góða ferð til Patreksfjarðar á Landsmótið í skólaskák nú um helgina. Í eldri flokki var Jón Kristinn Þorgeirsson allan tímann í baráttunni um sigurlaunin. Hann leyfði aðeins tvö jafntefli í 11 skákum en varð hálfum vinningi á eftir sigurvegaranum Óliver Aron Jóhannessyni úr Fjölni. Símon Þórhallsson tryggði sér svo þriðja sætið örugglega. Þessi árangur tryggir okkur á Norðurlandi eystra tvö sæti í flokknum á næsta landsmóti.

Í yngri flokki átti Óliver Ísak við ramman reip að draga. Hann tapaði fyrstu sex skákum sínum, en spýtti svo í lófana og uppskar fjóra vinninga þegar upp var staðið. Hilmir Freyr Heimisson vann yngri flokkinn. Með árangri sínum upp á 1135 stig kemur Óliver væntanlega inn á næsta stigalista, sem er mikilvægur áfangi. Hann getur verið vel sæmdur af árangrinum á sínu fyrsta landsmóti. 

Rétt er að athuga að þeir félagar allir þrír eiga eftir tvö ár í sínum flokkum og munu eflaust nýta þau til að bæta sig verulega!