Spenna og óvænt úrslit hjá grunnskólanemendum

Í gær fór fram Kjördæmamót, eða Umdæmamót eins og farið er að kalla þau, fyrir Norðurland eystra. Mótið er liður í landskeppninni í skólaskák. Keppt var að Laugum og stjórnaði Hermann goði mótinu í samræmi við titilinn. Umhugsunartími var 15 mín á skák og keppt var í tveimur flokkum, eldri og yngri. Í eldri flokki eru nemendur í 8.-10. bekk.

Félagar úr Skákfélagi Akureyrar voru áberandi a mótinu.

Í yngri flokki sigraði Óliver Ísak, sem er í 5. bekk. Hann hlaut 4,5 af 5 vinningum. Er þetta vel af sér vikið hjá hinum unga Óliver.

Í eldri flokki má segja að úrslitaskákin hafi verið tefld strax í 2. umferð. Þá áttust við bekkjarbræðurnir og vinirnir Jón Kristinn, margfaldur Íslandsmeistari, og Símon Þórhallsson. Símon hafði hvítt í skákinni og náði að vinna biskup Jóns í endataflinu fyrir peð. Jón er hugmyndaríkur skákmaður og fann leið til að skipta upp peðunum þannig að Símon gæti ekki vakið upp drottningu og þar með unnið. Símon féll í gildruna og upp kom fræðilegt jafntefli. Í tímahrakinu lék Jón af sér og kom ekki kóngi sínum á réttan reit svo Símon sigraði í skákinni.

Símon sigraði með fullu húsi, 4 vinninga af 4 mögulegum en Jón varð annar, vinningi á eftir. Það er því ekki endilega víst að Íslandsmeistarinn Jón komist í úrslitakeppnina. Reglurnar mæla reyndar fyrir að stigahæstu menn þeirra sem ekki vinna sér rétt til þátttöku komist í úrslitakeppnina og þar gæti opnast gluggi fyrir Jón og vonandi einnig fyrir Andra Frey Björgvinsson.

 

Lokastaðan í eldri flokki.

1. Símon Þórhallsson          4  af 4
2. Jón Kristinn Þorgeirsson  3
3. Hlynur Snær Viðarsson   1,5
4. Benedikt Stefánsson       1
5. Bjarni Jón Kristjánsson    0,5

Lokastaðan í yngri flokki:

1. Óliver Ísak                                4,5 af 5
2. Sævar Gylfason                         4
3. Guðmundur Aron Guðmundsson  3,5
4. Ari Rúnar Gunnarsson                 2
5. Helgi James Þórarinsson              1
6. Elvar Goði Yngvason                   0