Gull, silfur og brons! Jón Kristinn Íslandsmeistari!

Unglingarnir okkar voru svo sannarlega að gera garðinn frægan í höfuðborginni nú um helgina. Þá fór þar fram unglingameistaramót Íslands (20 ára og yngri), auk Íslandsmóta í drengja- og stúlknaflokki (15 ára og yngri) og í pilta- og telpnaflokki (13 ára og yngri). Í elsta flokknum átti Mikael Jóhann Karlsson

titil að verja frá í fyrra, en átti nú við ramman reip að draga það sem alþjóðlegi meistarinn Hjörvar Steinn Grétarsson var. Sá vann allar sínar skákir en Mikael hreppti annað sætið af miklu öryggi. Öll nánari úrslit má sjá hér.

Við áttum ekki keppanda í 15 ára flokknum í ár, en í flokki 13 ára og yngri voru þeir Símon Þórhallsson og Jón Kristinn Þorgeirsson í toppbaráttunni allan tímann. Símon vann innbyrðis skák þeirra í 3. umferð og var aðeins hársbreidd frá því að vinna titilinn þegar hann var með gjörunnið tafl gegn Hilmi Frey Heimissyni í lokaumferðinni, en missté sig í tímahraki og tapaði. Mikið áfall fyrir Símon sem þarna var nálægt því að landa sínum fyrsta stóra titli. Hann bar sig þó karlmannlega og fagnaði bronsverðlaununum í flokknum. Með úrslitunum í skák hans og Hilmis varð sá síðarnefndi jafn Jóni Kristni í efsta sæti og tefldu þeir einvígi um titilinn sem okkar maður vann örugglega 1,5-0,5. Jón átti gott mót og vann alla sigra sína af öryggi. Þeir vopnabræður munu væntanlega eiga aðra glímu um Íslandsmeistaratitilinn í 15 ára flokknum að ári.  Nánar um keppnina á skák.is og öll úrslit hér.

Við Skákfélagsmenn óskum þessum fræknu ungliðum okkar til hamingju með glæsilegan árangur á mótinu og erum öll ákaflega stolt af þeim félögum.