Æfingamót á morgun

Yfirstandandi helgi var upphaflega tekin frá fyrir Skákþing Norðlendinga, en af því varð ekki nú. Í staðinn verður mótið háð hér á Akureyri um Hvítasunnuna. En alltént verður teflt á morgun; æfingamót fyrir alla sem þurfa að liðka sig og vilja gamna sér við skákgyðjuna. Mótið hefst kl. 13 og tímamörkin verða í anda Bronsteins gamla; 5 mínútur með 3 sekúndna töf í hverjum leik. Sé leikið innan 3 sekúndna stendur klukkan kyrr!