Enn ein fréttin af Reykjavíkurmótinu.

8. umferð N1 Reykjavíkurmótsins lauk í kvöld en þegar þetta er skrifað er ekki ljóst hverjir verða andstæðingarnir í lokaumferðinni.

Stefán Bergsson (2171) þurfti að bíta í það súra epli að tapa í dag fyrir Halldóri Pálssyni (2000). Stebbi hefur 3,5 vinninga og frammistaða hans jafngildir 1956 skákstigum.

Mikael Jóhann Karlsson (1884) gerði jafntefli við CM Mark Huizer (2122) frá Hollandi og er með 3,5 vinninga eins og Stefán. Mikki hefur teflt við sterka andstæðinga í mótinu og frammistaða hans jafngildir 2036 skákstigum sem sýnir hvað hann er orðinn sterkur.

Óskar Long Einarsson (1618) er að rétta sinn hlut og gerði í dag jafntefli við þýska skákmanninn Elvira Mass (2040). Hann hefur nú 2,5 vinninga Frammistaða hans er metin upp á 1590 skákstig. Óskar er 177. stigahæsti skákmaðurinn í mótinu og er nú í 176. sæti. Það má því með sanni segja að hann sé á pari.

Andri Freyr (1544) tapaði fyrir Indverjanum  Vijay Bharat (1941) og er með þrjá vinninga. Hann hefur teflt við stigahærri andstæðinga allt mótið og frammistaða hans er metin upp á 1894 skákstig.

Unglingarnir okkar eru að salla inn skákstigum en Óskar og Stefán lækka lítillega miðað við þessa frammistöðu. Fréttaritari óskar þeim öllum góðs gengis í lokaumferðinni.