Skákdagurinn mikli á morgun!

Á morgun, fimmtudaginn 26. janúar rennur upp Skákdagurinn mikli. Þá verður hinn ástsæli stórmeistari okkar Íslendinga, Friðrik Ólafsson, 77 ára og við fögnum því með því að tefla um allt land sem aldrei fyrr. Hér á Akureyri verður ýmsilegt um að vera, til að mynda þetta:

1. "Sundskák" í Sundlaug Akureyrar kl. 8 að morgni. Akureyrarmeistarinn Smári Ólafsson mun þá vígja nýtt skáksett sem hentar sérlega vel til tafliðkunar við þessar aðstæður og gefst sundlaugargestum tækifæri til að reyna sig við kappann.

2. Magister Sigurður Arnarson teflir fjöltefli í Síðuskóla. Fjölteflið hefst kl. 9.40 og mun Sigurður tefla við um 40 krakka úr elstu bekkjunum í einu. Þeir sem vinna Sigurð fá innleggsnótu á eilífa sæluvist á himnum, (þegar þar að kemur).

3. Skákmót í Pennanum-Eymundsson í Hafnarstræti kl. 17. Þar fá viðstaddir m.a. að spreyta sig í hraðskák við hinn 12 ára gamla Jón Kristinn Þorgeirsson, tvöfaldan Íslandsmeistara barna og sigurvegara á meistaramóti Skákfélagsins sl. haust. Jón Kristinn er nú að undirbúa sig fyrir Norðurlandamót í skólaskák sem haldið verður í Finnlandi um miðjan febrúar.

4. Um kvöldið (eigi síðar en kl. 20) verður opið hús í hjá Skákfélaginu í Íþróttahöllinni. Þar munu valdar skákir afmælisbarnsins, Friðriks Ólafssonar,  verða sýndar með skýringum og gestir geta kynnt sér starfsemi Skákfélagsins og tekið eina bröndótta. Heitt verður á könnunni.

Allir skákmenn og áhugamenn um fagurt mannlíf og fjörugt skáklíf eru hvattir til að mæta og leggja sitt að mörkum með líflegri þátttöku á skákdeginum.  Við hlökkum til!