Jón Kristinn langfyrstur í mótaröðinni

Sjöunda og næstsíðasta (en ekki síðasta eins og einhver jólasveinn skrifaði hér á síðuna í síðustu færslu) mótið í hinni geysivinsælu mótaröð félagsins var tefld í gærkveldi. Ekkert sást til Kertasníkis, enda mun hann ekki enn vera kominn til byggða. Engin umræða var um félagsgjöld. Hinsvegar tefldu átta vaskir skákvíkingar tvölfalda umferð. Baráttan stóð lengst af milli fulltrúa ungu kynslóðarinnar og eins af aldurhningari keppendunum og tókst þeim gamla að merja sigur. Æskan mun hinsvegar erfa landið eins og staðan í mótaröðinni sýnir. En svona fór mótið:

1. Áskell Örn Kárason   12 v. af 14

2. Jón Kristinn Þorgeirsson 11,5

3. Andri Freyr Björgvinsson 8

4. Tómas Veigar Sigurðarson 7,5

5-6. Sigurðar Arnar- og Eiríkssynir 6,5

7. Ari Friðfinnsson    3 

8. Logi Rúnar Jónsson   1

Þegar eitt mót er eftir hefur Jón Kristinn náð stjarnfræðilegri forystu og mun tæplega láta hana af hendi þótt eftir því væri leitað. Staðan í toppbaráttunni er annars þessi (samanlagður fjöldi vinninga í keppninni): 

1. Jón Kristinn 69, 2. Sigurður Arnarson 50, 3. Haki Jóhannesson 39, 4. Sigurður Eiríksson 35, 5. Áskell Örn 28,5 6. Andri Freyr 28. (Hér vekur sérstaklega athygli hörð barátta Áskels og Andra um 5. sætið).

Lokamótið í röðinn verður svo háð næsta fimmtudag, 15. desember.