Haustmót TR

Í gær lauk 7. umferð Haustmóts TR en tefldar verða 9. umferðir. Þrír af okkar félögum voru í beinni útsendingu í gær og fengu samtals 2,5 vinninga. http://dl.skaksamband.is/mot/2011/HTR/r7/tfd.htm Eina tap okkar manna var í c-flokki þar sem ekki eru beinar útsendingar. Gengi okkar manna í mótinu er sem að neðan greinir. Í a-flokki eigum við 2 keppendur, Stefán Bergsson og Þór Valtýsson. Stefán vann Þorvarð Ólafsson með svörtu eftir að hafa beitt franskri vörn og fórnað skiptamun í 16. leik. Þór gerði jafntefli við Davíð Kjartansson í flókinni og skemmtilegri skák. Stefán er nú í 6. sæti flokksins og Þór í því 9 en það eru einmitt sætin sem þeim var skipað í samkvæmt styrkleikaröðun fyrir mótið. Í b-flokki eigum við einn keppanda, Mikael Jóhann Karlsson. Hann var 8. stigahæsti keppandinn í flokknum og tapaði sinni fyrstu skák í mótinu en hefur nú teflt 6 skákir í röð án taps. Þrjú jafntefli og þrír sigrar. Þessi árangur hefur fleytt honum í 2. sæti flokksins og fært honum stigahækkun upp á 17,3 alþjóðleg skákstig. Í gær þurfti Örn L. Jóhannsson að lúta í gras fyrir Mikka eftir að hafa fengið betri stöðu út úr byrjuninni. 

Í c-flokki er Óskar Long í 5. sæti með 3 vinninga en hann var nr.7 á styrkleikalista flokksins. Þrátt fyrir það hefur hann tapað 38,7 stigum á mótinu en hann hefur verið í mikilli framför að undanförnu. Í gær tapaði hann fyrir Jóni Trausta Harðarsyni.

Enn eru tvær umferðir eftir og óskum við okkar mönnum góðs gengis í mótinu.