Íslandsmót skákfélaga:

Árangur sveita SA eftir vonum

Það hefur víst ekki farið fram hjá neinum að um síðustu helgi fór fram fyrrihluti Íslandsmóts skákfélaga í Rimaskóla í Reykjavík. Umgjörð keppninnar þar og skipulag er orðið vel mótað og gengur afar farsællega. Við Skákfélagsmenn sendum nú fjórar sveitir til keppni eins og í fyrra. Örstutt um árangur sveita og liðsmanna:

A-sveitin tefldi í 1. deild eins og í fyrra og á þar við ramman reip að draga, enda eina sveitin sem ekki hefur stórmeistara innanborðs. Eins og nú er háttað dugar ekkert minna en að tefla fram sveit með meðalstigum upp á 2400-2500 til að eiga von um verðlaunasæti. Val o0kkar hefur verið að byggja sem mest á heimafengnum kröftum, en til styrkingar fáum við góða félaga frá Danmörku. Þannig hafa danskir meistarar oft skipað tvö fyrstu borðin á a-sveitinni og svo var einnig nú. Það sem sveitina skorti e.t.v. í styrkleika á efstu borðum, vann hún upp með góðri breidd og frábærum árangri á neðri borðunum. Þannig tókst okkur að leggja a-sveit TR að velli og einnig fyrrum félaga okkar í Mátum, sem nú tefldu í efstu deild í fyrsta sinni. Sveitin er nú í 6. sæti með 13,5 vinninga og ætti með sama áframhaldi að ná að bjarga sér frá falli. Bestir okkar manna voru þeir Stefán Akademus Bergsson og „gamla kempan“ Ólafur Kristjánsson, sem báðir fengu 3 vinninga úr 4 skákum. b- og c-sveitir félagsins tefldu í 3. deild, þar sem ekki var síður hart barist. B-sveitin heldur sig í efri hluta deildarinnar með 5 stig af 8 mögulegum (2 stig fyrir unna viðureign, 1 stig þegar bæði lið fá 3 vinninga), en c-sveitin, sem eins og í fyrra var skipuð heldri mönnum milli sextugs og níðræðs, er enn án stiga og mun vísast eiga erfiða baráttu fyrir höndum í seinni hlutanum. Bestum árangri okkar manna í 3. deild náði Mikael Jóhann Karlsson, fékk þrjá vinninga af fjórum.

Í 4. deild tefldi svo d-sveitin, sem eingöngu var skipuð unglingum á grunnskólaaldri. Þeirra er framtíðin og greinileg framför frá því á síðasta móti. Okkar menn eru nú í miðri deild og stefna hærra. Fyrstaborðsmaðurinn Jón Kristinn fékk hér einnig 3 vinninga í fjórum skæákum og vann m.a. það afrek að leggja að velli Björn Þorsteinsson, fyrrverandi Íslandsmeistara, í góðri skák.

Þeir Mikael og Jón Kristinn fengu óvæntan glaðning í upphafi mótsins, þegar Anatólí Karpov, sem var heiðursgestur við setninguna, afhenti þeim verðlaun fyrir sigurinn á Landsmótinu í skólaskák sl. vor. Þetta var skemmtileg viðhöfn og þeim félögum og Skákfélaginu til mikils heiðurs.

Þegar árangurinn er gerður upp má hann teljast viðunandi. Þegar stigatap og -gróði einstakra liðsmanna, (að dönunum frátöldum) er gerður upp, má sjá að við höfum unnið 56 stigum meira en við höfum tapað.  Með sama áframhaldi munum við sigra heiminn.

Öll úrslit á mótinu má annars nálgast hér.