Hraðskákkeppni taflfélaga: Sigur í fyrstu umferð

Skákfélagið dróst á móti Taflfélagi Garðabæjar í 16.liða úrslitum og var teflt í gær í húsakynnum Skákakademíunnar. Eins og kunnugt er fer keppni þessi fram á höfuðborgarsvæðinu og mæðir því mest á þeim félögum okkar sem þar dveljast. Teflt er eftir sk. bændaglímufyrirkomulagi, tvöföld umferð á sex borðum, alls 12 umferðir, 72 skákir.

Hart var barist í gær og viðureignin jöfn framanaf. Eftir 5 umferðir höfðu Garðbæingar eins vinnings forystu, 15,5-14,5, en þá spýttu menn í lófa svo um munaði og unnu næstu þrjár með yfirburðum 14-4. Síðan var siglt hægum byr til hafnar og lauk viðureigninni með 10 vinninga sigri svellkaldra norðanmanna 41-31.

Vinningar skiptust svona (allir tefldu 12 skákir):

Halldór Brynjar 10

Stefán Bergsson 8,5

Gylfi og Jón Þ. Þór 8

Sigurjón 4

Þór 2,5

Í 8 liða úrslitum mun félagið etja kappi við sigurvegara í viðureign Máta og TR sem fer fram í kvöld.