BSO mótið á fimmtudag.

Hið árlega BSO-mót fer frá fimmtudaginn 5. maí nk. í Skákheimilinu. Taflið hefst kl. 20. Við teflum hraðskák.

Rúnar Sigurpálsson skákmeistari Akureyrar 2022

Seinni skák þeirra Rúnars og Andra Freys Björgvinssonar um Akureyrarmeistaratitlinn er nýlokið með sigri Rúnars. Fyrri skák þeirra félaga lauk með jafntefli og ef aftur hefði orðið jafnt í dag hefði þurft að útkljá titilbaráttuna í styttri skákum, en til þess kom ekki. Til upprifjunar minnum við á að þeir félagar urðu jafnir og langefstir á Skákþingi Akureyrar sem hófst í janúarlok.

Rúnar varð einnig meistari á síðasta ári og mun þetta vera í sjötta sinn sem hann vinnur þennan eftirsótta titil. Hann er hefur einnig orðið hraðskákmeistari Akureyrar þessi tvö ár og reyndar unnið flest mót sem hann hefur tekið þátt í á vegum félagsins undanfarin ár. 

Við óskum honum til hamingju með titilinn. 

Myndin með fréttinni er tekin rétt eftir skákina.

 

Rúnar hraðskákmeistari

Rúnar Sigurpálsson heldur áfram sigurgöngu sinni á meistaramótum Skákfélagsins. Því hraðar sem teflt er, þeim mun meiri líkur eru á sigri Rúnars. Þetta sannaðist enn og aftur á Hraðskákmóti Akureyrar sem fram fór nú um páskana og var um leið páskahraðskákmót. 
Rúnar, sem unnið hefur hraðskákmeistaratitilinn árin 2018, 2019, og 2021, (var ekki með 2020) náði enn og aftur að hreppa titilinn á mótinu í ár, reyndar eftir harða baráttu við Símon Þórhallsson, en Rúnar tryggði sér titilinn með sigri í þeirra innbyrðis skák. Keppendur voru alls 12 talsins og fékk Rúnar 10,5 vinning en Símon 10. Óvæntust var e.t.v. þriðja sæti Benedikts Stefánssonar; sem fékk 9. vinninga. Með þessum árangri bætti Benedikt næstum 140 stigum í safn sitt, sem er fáheyrt. Árangur hans hlóðaði upp á ein 2050 stig; sem er rúmlega 600 stigum umfram hans eigin stig fyrir mótið (1419). Eru líklega fá dæmi um annað eins. 
Um önnur úrslit vísast til töflunnar á Chess-results.

Í kvöld, 25. apríl setjast þeir vopnabræður, Andri Freyr Björgvinsson og Rúnar að tafli til að útkljá það hvor þeirra hreppir hinn eftirsóknarverða titil "Skákmeistari Akureyrar 2022". Þeir tfala þá fyrri skákina í einvíginu um titilinn; sú síðari verður tefld þann 1. maí og lokarimman (ef jafnt verður eftir tvær skákir) fer svo fram daginn eftir.