Stjórn félagsins endurkjörin á aðalfundi.

Aðalfundur Skákfélags Akureyrar var haldinn 26. september sl. Þetta var rólegheitafundur og lítið um sviptingar. Formaður kynnti skýrslu sína um starfsárið sem var að ljúka, (skýrsluna má finna hér á heimasíðunni) og gjaldkeri lagði fram ársreikning. Þar kom fram að rekstur félagsins er í jafnvægi, lítilsháttar tekjuafgangur af síðasta fjárhagsári. Eignir félagsins nema nú rúmlega 8 milljónum króna, í fjármunum og búnaði. Voru reikningar samþykktir samhljóða.
Öll fráfarndi stjórn gaf kost á sér til endurkjörs og var samþykkt án mótatkvæða. Hana skipa Áskell Örn Kárason (form:), Rúnar Sigurpálsson, Smári Ólafsson, Andri Freyr Björgvinsson, Óskar Jensson og Stefán Steingrímur Bergsson. Form. er kjörinn sérstaklega, en að öðru leyti á stjórnin eftir að skipta með sér verkum. Frést hefur að verkaskipting verði að mestu óbreytt frá fyrra ári.   

Haustmótið; þrír jafnir í efsta sæti!

Úrslit dagsins:
Markús-Stefán     1/2
Sigurður-Smári    0-1
Karl-Áskell       0-1

Sviptingarskákir, einkum tvær þær fyrstnefndu. Markús spennti bogann of hátt í miðtaflinu og lenti í töpuðu hróksendatafli. Hann varðist þó vel og náði að þvinga fram jafntefli eftir mistök andstæðingsins. 
Sigurður og Smári tefldu þunga baráttuskák og eftir laglega hnykk í miðtaflinu fékk Sigurður hartnær unnið tafl. Hann var þó í vandræðum með að finna gott framhald og missti skákina niður í hróksendatafl þar sem kóngur svarts geystist fram á völlinn og knúði fram sigur fyrir Smára.
Áskell fékk snemma þægilegt tafl með svörtu og tókst að ná fram sigri, þrátt fyrir harðvítuga andspyrnu Karls. 
Þegar þremur umferðum af fimm í þessari úrslitakeppni er lokið eru þeir Markús, Smári og Áskell jafnir í efsta sæti með tvo vinninga, en Stefán kemur næstur með einn og hálfan. Í fjórðu umferð, sem tefld verður nk. fimmtudag eigast þessir við:
Stefán og Áskell
Smári og Karl
Markús og Sigurður 
 

Haustmótið - þriðja umferð úrslitanna í dag

Önnur umferð í úrslitakeppni haustmótsins var tefld á fimmtudag:
Áskell-Sigurður    1-0
Smári-Markús       1/2
Stefán-Karl        1/2
Wdtir tvær umferðir hefur Markús einn og hálfan vinning, Áskell, Karl, Smári og Stefán einn og Sigurður hálfan.

Í þriðju umferðinni kl. 13 í dag mætast þessir:
Markús og Stefán
Sigurður og Smári
Karl og Áskell

Mótið á chess-results.